Dia Internashonal di profeshonalnan den Rekurso Humano

Willemstad – Na okashon di Dia Internashonal di profesonalnan den rekurso humano (HR), Ministerio di Maneho di Gobernashon, Planifikashon i Servisio Públiko (BPD) ta ekspresá sinseramente su apresio na tur empleado di HR den gobièrnu di Kòrsou.
Human Resources ta desempeñá un ròl indispensabel den nos organisashon públiko. Tur dia, profesionalnan di HR ta traha ku dedikashon pa atraé, guia, desaroyá i sostené empleadonan ku ta komprometé ku komunidat. Danki na nan ekspertisio, kompromiso i dedikashon, pa fortifiká un gobièrnu fuerte, profeshonal i prepará pa futuro.
En partikular, e ministerio ta ekspresá su apresio pa empleadonan di Organisashon HR, ku ta kai bou di Ministerio di BPD. Nan esfuerso ta kontribuí na un organisashon di personal moderno, unda desaroyo, kolaborashon i bon empleadó ta para sentral.
Dia Internashonal di HR ta brinda un momento propio pa reflehá riba e trabou importante ku profesionalnan di HR ta hasi tras di pantaya. Nan kontribushon tin gran balor pa e funshonamentu i e fortifikashon kontinuo di nos organisashon gubernamental.
Ministerio di Maneho di Gobernashon, Planifikashon i Servisio Públiko (BPD) ta felisitá tur e empleadonan di HR ku e dia speshal aki i ta gradisí nan pa nan kompromiso kontinuo, profeshonalismo i dedikashon.