E obra di arte “3 Lil Birds” a haña un aparensha nobo inspirá pa “The Blue Wave”

Willemstad- E obra di arte “3 Lil Birds” a haña un aparensha nobo inspirá pa “The Blue Wave”
Den kuadro di  klasifikashon di nos selekshon nashonal di futbòl, e obra di arte “3 Lil Birds”, kreá pa e artista lokal Omar Sling i situá  na Plasa Jojo Correa  a hana un aparensha nobo inspirá pa e tema di “The Blue Wave”. Nos selekshon nashonal di futbòl a demonstrá na nos pueblo kon leu nos por yega ora nos rekonosé, apoyá i desaroyá nos talentonan lokal.

E obra di arte “3 Lil Birds” ta simbolisá un triángulo fuerte di amor, union i sosten. E mensahe sentral di e obra ta enfoká riba loke ta uni nos komo pueblo di Kòrsou i kon nos por sigui traha huntu pa progreso di nos pais. E obra di arte aki ta konsistí di un trio musikal ku ta ilustrá tres barika hel, di kual a elaborá ku materialnan resiklá i otro elementonan reutilisá. Kada un di e barika helnan ta disponé di un instrumento músikal diferente, entre otro un gitara, maraka, kamoana inkluyendo dos tambú.

E obra di arte aki ta rekordá nos ku asta loke por parse simpel òf sin balor, por transformá den algu ku hopi signifikashon. Ademas di su balor artístiko, e instalashon ta trese bida i alegria na nos sentro di suidat, mientras ta kontribuí pa pone Kòrsou mas visibel riba nivel internashonal. Turista i bishitante lokal ta bin ku interes pa admirá i saka potrèt, loke ta yuda promové e kultura i beyesa di nos isla na un manera natural i orgániko.

E obra di arte no ta solamente un elemento visual pa trese un ambiente alegre den kurason di Punda, pero tambe e ta un símbolo di identidad i orguyo lokal. E para Barika Hèl ta mas ku djis un para komun, e ta un parti vital di Kòrsou su identidat, ekosistema i bida diario. Ademas, e uzo di materialnan resiklá i reutilisá ta reforsá e mensahe di sostenibilidad i kreatividad, mustrando kon arte por duna un bista nobo na kosnan kotidiano.

E obra aki ta representá alegria, union i speransa. Su presensia ta inspirá nos pa laga loke ta dividí nos atrás i sigui dilanti ku konfiansa i positivismo. Nos pueblo ta ampliamente konosí pa su amor pa kosnan dushi, bon ambiente i bon músika, balornan ku e obra aki tambe ta reflehá klaramente

Pueblo di Kòrsou kompletu ta keda invita pa bishitá i admirá e bunita obra di arte aki, awor ku su aparensia nobo di “The Blue Wave”.