Minister Boekhoudt a bishitá varios organisashon di kuido na Hulanda

Siman pasá, Minister Boekhoudt, a realisá bishitanan di trabou na diferente organisashon di kuido na Hulanda den kuadro di interkambio di konosementu i pa fortifiká kuido pa grandinan i kuido duradero na Kòrsou.

E minister a bishitá Argos Zorggroep i Zonnehuisgroep Vlaardingen, kaminda el a haña mas informashon tokante kuido pa grandinan, kuido pa hende ku demensia, rehabilitashon, inovashon i maneho di organisashonnan di kuido.

Durante e bishitanan, a papia tambe tokante e preshon finansiero riba sektor di kuido, e reto di envehesimentu di e poblashon i e importansia di reforma, efisiensia i kolaborashon den e kadena di kuido. Un otro tema importante tabata e enfoke humano i holístiko ku Hulanda ta apliká, kaminda kalidat di bida, outonomia i bienestar di e pashènt ta sentral.

Minister Boekhoudt a deskribí e bishitanan komo masha balioso i inspiradó. Segun Minister Boekhoudt, e eksperensianan i konosementu aki lo yuda Kòrsou sigui desaroyá i reforsá kuido pa nos grandinan.