Prome Minister Mike Eman a reuni na Den Haag cu escritor Hulandes Hans Verbeek, autor di e buki “De Vergeten Minister-President”. E buki ta relata e bida y carrera politico di Gerrit Schimmelpenninck, e prome minister-presidente di Hulanda, y ta ofrece un perspectiva nobo riba e debate constitucional importante rond di 1848. Durante e encuentro, a intercambia algun pensamento. Como señal di aprecio, Prome Minister Mike Eman a entrega Hans Verbeek un copia di e buki “Volk van Veerkracht” di Luc Alofs y René Zwart, un publicacion cu ta conta e historia di resiliencia y fortalesa di pueblo Arubiano. Na su turno Verbeek a firma su mesun buki, De Vergeten Minister-President.
Thom van Campen ta destaca importancia di mantene contacto regular y vision comparti pa futuro di Reino.
Durante su bishita oficial na Den Haag, Prome Minister mr. Mike Eman a reuni cu presidente di Tweede Kamer der Staten-Generaal, Thom van Campen (VVD). Durante e encuentro, ambos lidernan a dialoga riba e relacionnan historico dentro di Reino Hulandes y e oportunidadnan pa sigui fortalece cooperacion den diferente area strategico.
Van Campen a expresa cu tabata “un placer y honor” pa ricibi e Prome Minister di Aruba den Tweede Kamer, reconociendo e agenda amplio y intenso cu e delegacion di Aruba tin durante nan estadia na Hulanda. Segun e voorzitter, e encuentro a enfoca no solamente riba e relacion historico entre Aruba y Hulanda, sino tambe riba e posibilidadnan pa futuro den area manera cultura, naturalesa y desaroyo economico. Durante e bishita, Van Campen a enfatisa cu ta importante pa tur paisnan dentro di Reino continua fortalece e sentido di cooperacion y conexion mutuo. Segun Van Campen, Aruba y Hulanda ta comparti un futuro comun dentro di Reino y dialogo habri ta esencial pa mantene e relacionnan fuerte. E presidente di Tweede Kamer a expresa tambe aprecio p’e forma cu Prome Minister Mike Eman ta representa Aruba y Reino den Hulanda, incluyendo su presencia den diferente media Hulandes pa splica con e diferente paisnan dentro di Reino ta conecta entre nan y kico ta e vision comparti pa futuro.
Como gesto simbolico di aprecio y amistad, Prome Minister Mike Eman a entrega un regalo n’e presidente di Tweede Kamer e buki Volk van Veerkracht, un publicacion cu ta relata e historia, resiliencia y identidad di pueblo Arubano dentro di Reino Hulandes.
Progressief Nederland ta mira futuro di Aruba cu optimismo y cooperacion den Reino. Jesse Klaver ta enfatisa importancia di continua fortalece e lasonnan entre Aruba y Hulanda
“Nos ta separa door di un oceano, pero nos ta conecta door di un historia comparti. Ta importante cu nos sigui construyendo hunto rib’e futuro nobo di Reino,” Klaver a expresa despues di e reunion. Durante e encuentro, a dialoga riba diferente tema strategico, incluyendo cooperacion den area di conocemento, innovacion y e rol cu instituto manera TNO por hunga den futuro economico di Aruba. Klaver a expresa cu el a aprecia e vision comparti pa Prome Minister Mike Eman y a destaca su experiencia politico y direccion strategico. “E Prome Minister ta un homber cu un trayectoria hopi largo y cu un vision sumamente interesante. Mi ta contento cu el a comparti esaki cu nos awe,” Klaver a comenta.
Durante un encuentro den Tweede Kamer der Staten-Generaal cu delegacion di Aruba, lider di fraccion Progressief Nederland, Jesse Klaver, a enfatisa e importancia di mantene dialogo y cooperacion activo entre e diferente paisnan den Reino Hulandes. E reunion cu Prome Minister mr. Mike Eman tabata centra riba futuro di Reino, cooperacion strategico y e vision pa desaroyo sostenibel y economia di conocemento den Aruba.
Progressief Nederland ta e movemento politico cu a surgi for di e fusion entre GroenLinks y PvdA, cu e meta di reuni e forsa progresista den Hulanda alrededor di tema social, sostenibilidad y cooperacion internacional. Segun Klaver, e relacion entre Aruba y Hulanda mester continua basa riba respeto mutuo y e conciencia cu tur pais den Reino ta comparti un historia y un responsabilidad comun.
Prome Minister mr. Mike Eman a reuni awe cu lider di CDA, Henri Bontenbal, den Tweede Kamer na Den Haag. Durante e encuentro, a dialoga riba futuro di Reino, cooperacion entre Aruba y Hulanda, y e importancia di continua fortalece e relacionnan institucional den Reino Hulandes. Tijs van den Brink Miembro di Tweede Kamer pa CDA y den comision fiho di Relacionnan di Reino den Tweede Kamer tambe tabata presente.
Mas di trinta studiante y hoben profesional Arubiano a reuni awe na Den Haag pa un anochi di dialogo, inspiracion y conexion hunto cu Prome Minister Mike Eman. Durante e encuentro a intercambia idea riba futuro di Aruba, oportunidadnan pa hoben profesionalnan y e importancia di involucra talento Arubiano den desaroyo di nos pais. Un anochi yena di energia positivo, pensamiento nobo y compromiso cu Aruba.
Prome Minister Mike Eman a reuni awe cu Prinses Laurentien na Number Five Foundation na Den Haag, caminda el a entrega e ultimo buki compila pa René Zwaart y Luc Alofs: Volk van veerkracht. Un encuentro caloroso y significativo.
KOMPARTI E NOTISIA AKI VIA / Share the news
Related
639114718427035"
639114718427035"
