Prome Minister Mike Eman a cana awe mainta den area di Caya Bonaire y Bernhardstraat na San Nicolas, unda comunidad a reuni pa haci un homenahe especial na un ciudadano cu a dedica gran parti di su bida na bienestar di su bario: Michael Clark

Michael Clark a lanta y a biba henter su bida den Village. Como un yiu di e bario, el a conoce cada caya, cada famia y cada historia cu a forma e comunidad. For di mucha, el a dedica su mes na sirbi y yuda su bisiñanan, semper dispuesto pa duna un man ora cu tabatin necesidad.

Durante e encuentro, a comparti cu Michael ta sinti un responsabilidad especial pa cuida y mantene su bario limpi y bunita. Aun cu el a mira hopi cambio den e area durante e añanan, su amor pa Village y San Nicolas a keda firme. Segun Michael, e clave pa futuro ta den unidad, cooperacion y compromiso di comunidad pa sigui mehora e imagen y calidad di bida den e distrito.

Michael tin speranza den e direccion cu Aruba ta tumando actualmente y a indica cu e proyecto di revitalisacion di Bernhardstraat lo contribui significativamente na hisa e imagen di San Nicolas y mehora e calidad di bida di su habitantenan.

Prome Minister Mike Eman a gradici Michael Clark pa su dedicacion incansabel y pa e ehempel cu el ta representa di amor pa comunidad, servicio y compromiso ciudadano. E encuentro a sirbi como un reconocemento mereci pa un homber cu durante decenionan a contribui na mantene bibo e espiritu di Village y San Nicolas.