Diaranson Lucia Beck, hunto cu Jefka Alberto, a reuni cu Prome Minister Mike Eman den cuadro di e preparacionnan pa e Dia Nacional di Conmemoracion di Abolicion di Sclavitud, cu lo wordo conmemora dia 1 di juli na Hulanda y den e paisnan Caribense di Reino.

E Comision Independiente pa Conmemoracion di Pasado di Sclavitud a wordo estableci despues di e disculpa oficial cu Gobierno Hulandes a presenta tocante e pasado di sclavitud. E ramo Caribense di e fundacion ta wordo dirigi pa directora Lucia Beck. Hunto cu NiNsee, e comision ta encarga cu organisacion di conmemoracionnan nacional.

E Comision di Conmemoracion di Pasado di Sclavitud ta comprometi na promove un conmemoracion digno, consciencia historico y dialogo constructivo tocante e herencia di sclavitud den henter Reino Hulandes. E meta ta contribui na mas comprension mutuo, reconocimento y conexion entre tur comunidadnan den Reino.