Kamanan na CMC blòkia pa motibu ku pashènt no por bai Betesda òf Hospice Arco Cavent
Minister di Salubridat, Medio Ambiente i Naturalesa
Sr. Tyron Boekhoudt
Willemstad, 8 Yüni 2026
Tópiko:
Kamanan na CMC blòkia pa motibu ku pashènt no por bai Betesda òf Hospice Arco Cavent
Apresiabel sr Boekhoudt,
Suskrito, miembro di frakshon di Movementu Futuro Kòrsou den Parlamento di Kòrsou, mr.drs. Javier Silvania, ta pidi bo atenshon pa lo siguiente.
Komunikado di prensa di CMC
Ku tristesa i pena suskrito komo eks minister Salubridat, Medio Ambiente i Naturalesa a tuma nota di e komunikado di 3 di yüni 2026 di Curaçao Medical Center (CMC). CMC ta informá komunidat ku 29 kama aktualmente ta okupá pa pashèntnan ku a finalisá nan tratamentu médiko. CMC no por duna di alto (‘òntslag’) na e pashèntnan aki pa motibu di e disponibilidat limitá na kasnan di kuido.
E okupashon prolongá aki ta pone ku CMC no por tuma pashèntnan nobo. CMC ta hañ’é obligá na kanselá operashon i e lista di espera pa operashon ta bira aun mas largu.
Segun Hunta di Direktiva di CMC: “E okupashon kontinuo di kamanan pa pashèntnan ku ta médikamente kla pa risibí nan ‘òntslag’ ta un preokupashon grandi. Esaki no ta un problema insidental, sino un preshon struktural (..). Ora kamanan no ta liber na tempu, pashèntnan ku tin mester di kuido ta haña nan konfrontá ku retraso innesesario den nan tratamentu. E problemátika aki ta eksigí akshon inmediato i koordiná den henter e sistema di kuido pa restorá un fluho di pashènt ku ta sigur i responsabel.”
‘Kortdurende zorg’ na Betesda
Fo’i 2024 suskrito komo minister di GMN a yega na un akuerdo ku gerensia di Betesda pa trese un solushon pa e problema di CMC aki. Den kuadro pa drecha e situashon finansiero prekario di Betesda suskrito a sinta den 2023 ku dr Rog i tende ideanan ku e tin. Dr Rog a trese e idea di ‘kortdurende zorg’ dilanti. Betesda tin un kantidat di kama i kapasidat di kuido disponibel pa por duna kuido na pashèntnan ku a finalisá nan tratamentu médiko na CMC. Pero pa diferente motibu no por bai kas ainda. Betesda ta asumí parti di e kuido posterior (‘nazorg’) di pashèntnan di CMC na un tarifa mas abou ku CMC. Di e forma aki Betesda ta generá entrada adishonal pa aliviá nan défisitnan finansiero.
Pa garantisá kontinuidat di Betesda i empleo di su trahadónan, suskrito a reuní na numeroso okashon ku Betesda, Curaçao Medical Centre (CMC), i Banko di Seguro Sosial (SVB) pa por hasi e idea aki realidat. Ministerio di GMN a yega na un akuerdo kaminda Betesda lo disponé di 40 kama pa kuido di korto plaso pa pashèntnan for di CMC. Betesda huntu ku SVB a yega na un akuerdo, kaminda Betesda lo risibí un presupuesto di 1.5 mion èkstra pa aña pa e ‘kortdurende zorg’. Esaki ta entrada èkstra pa Betesda riba lokual nan ta risibí kaba di SVB.
Suskrito den su kalidat di minister di GMN a hasi su esfuerso pa krea un situashon den kua tur hende ta sali ganá, aliviando CMC di kuido inadekuá i kostoso, i dunando Betesda mas trabou komo kas di kuido i alabes mas entrada. E entrada adishonal aki lo kontribuí na aliviá e défisit finansiero di Betesda. Ta p’esei suskrito a brasa e proposishon di dr Rog pa introdusí “kortdurende zorg”.
Betesda, un aktor importante den kasnan di kuido na Kòrsou, te dia di awe ta konfrontá problemanan serio den ámbito finansiero. Gerensia di Betesda mester wak kon e ta hasi tur fin di luna ku tur gastu, kon ta tene e nivel di kuido na unu akseptabel i tambe kon ta krea ku medionan finansiero limitá un ambiente agradabel pa e pashèntnan i e personal. Debí na e problemanan finansiero aki, e instituto no a paga belasting for di 2018 i e debe di impuesto a oumentá te ku alrededor di 15 mion florin.
Suskrito mester a baha komo minister i no por a terminá ku e trayekto. Konsiderando tur esaki, suskrito, hasiendo uso di artíkulo 96 di Reglamentu di Òrdu di Parlamento, ta hasi e siguiente preguntanan:
1. Minister a ehekutá e trayekto di ‘Kortdurende zorg’ na Betesda? Si e kontesta ta positivo. Ta dikon CMC no por duna di alto (‘òntslag’) na e pashèntnan aki pa motibu di e disponibilidat limitá na kasnan di kuido?
2. Fo’i dia ku minister a asumí e kartera di GMN kuantu bia minister a reuní ku Betesda, SVB, CMC, Birgin di Rosario, Hamiët i Hospice Arco Cavent pa atendé e problema di kama di CMC blòkia pa pashènt pa motibu di e disponibilidat limitá na kasnan di kuido i hospice?
3. Fo’i di dia minister a asumí e kartera kiko tabata tur e pasonan konkreto ku minister a tuma pa solushona e problema di kamanan di CMC blòkia pa pashèntnan pa motibu di e disponibilidat limitá na kasnan di kuido?
4. Ta bèrdat ku Betesda no a risibí pago di SVB pa e pashèntnan di CMC pa ‘kortdurende zorg’?
Hospice Arco Cavent
Komo minister di GMN, na 2023 suskrito a enkaminá e proseso pa laga RAC investigá i analisá e tarifanan di tur instansia di kuido na Kòrsou. E investigashon aki, e asina yama “onderzoek VVT”, kual ta enserá un investigashon pa ku Verpleging, Verzorging i Thuiszorg. Suskrito a pone e fondonan nesesario disponibel pa RAC por hasi e investigashon aki posibel. Dia 7 di desèmber 2023 suskrito a manda un karta pa RAC kaminda a pone e investigashon pa ku e tarifanan di instansianan di kuido komo prioridat di GMN.
Hospice Arco Cavent ta un kas di kuido kaminda hendenan den na último fase di bida ta haña guia i konsuelo. E ta ofresé un ambiente kaloroso i familiar kaminda e enfoke ta riba kalidat di bida, alivio di doló i sosten emoshonal, en bes di kurashon. Den 2023 Kòrsou tabata sufri di blackout. Ora koriente bai e machinan di oksígeno ta stòp di traha. Pa evitá ku pashèntnan ta fayese suskrito komo minister di GMN a duna òrdu pa kumpra un generator pa Hospice Arco Cavent. Durante un bishita di trabou suskrito a wòrdu informá dor di e direktor ku SVB no ta kubri gastu di pashèntnan. Suskrito a pidi RAC pa hasi un ‘kostprijs- i tariefonderzoek’ pa asina Hospice Arco Cavent por bin na remarke pa SVB kubri e gastunan di e pashènt. Sèptèmber 2025 RAC a manda e resultado di e ‘kostprijs
i tariefonderzoek’ di Hospice Arco Cavent pa GMN. Suskrito mester a baha komo minister i no por a firma e dekreto ministerial pa Hospice Arco Cavent. Gobernashon ta kontinuashon.
5. Den ki término di tempu Minister ta bai firma e dekreto ministerial pa asina SVB kubri gastunan di pashèntnan na Hospice Arco Cavent?
Suskrito ta apresiá si minister sr. Tyron Boekhoudt por duna kontesta riba e preguntanan hasí por eskrito den un término rasonabel i ku e tema aki lo haña e atenshon debido.
Atentamente,
Mr.drs. Javier Silvania,
Parlamentario pa
frakshon di MFK
