Hustisia pa nos kriadónan Ta basta ku hòrtamentu di bestia Parlamentario Juniël Carolina ku petishon pa ora di pregunta

Hustisia pa nos kriadónan

Ta basta ku hòrtamentu di bestia

Parlamentario Juniël Carolina ku petishon pa ora di pregunta

 

Resientemente a sosodé un insidente ku a lanta preokupashon den nos komunidat, kaminda un propietario di kunuku a sorprendé personanan ku, segun informashon disponibel, tabata presuntamente involukrá den intento di robo di un animal for di su tereno. Tambe a tuma nota ku gran preokupashon ku den e kaso ei e kriadó di bestia a keda detené debí na maltrato di e ladron di bestia. 

E akontesimentu aki a generá amplio reakshon den sektor agríkola i entre kriadónan di bestia, ku ta manifestá nan inkietut kresiente tokante e sintimentu di inseguridat den áreanan rural i e persepshon ku protekshon di nan propiedat no semper ta efektivo. 

Parlamentario pa frakshon di MFK den Parlamento di Kòrsou, sr. Juniël Carolina, ta duna un mensahe kla na tur agrikultor i kriadónan di bestia na Kòrsou: “bo preokupashon ta legítimo i bo bos ta wòrdu tende den Parlamento”.

Den e mesun rosea sr. Carolina ta enfatisá ku ta rechasá tur forma di violensia. Sr. Carolina ta mustra ku tur asuntu mester wòrdu trata den kuadro di lei i hustisia. Sin embargo, sr. Carolina ta demostrá komprenshon pa e frustrashon ku hopi kriadónan ta sinti ora nan ta mira ku e fruta di nan trabou duru, sakrifisio i invershon ta wòrdu afektá repetidamente pa ladronnan di bestia i vandalismo na nan propiedatnan.

Hasiendo uso di artíkulo 96A di Reglamentu di Òrdu di Parlamento, sr. Carolina den un karta na Presidente di Parlamento di Kòrsou, ta hasi e petishon pa un ora di pregunta, ku un serie di pregunta skèrpi na Minister di Hustisia. E preguntanan ta enfoká riba e magnitut real di e problema, e kantidat di kaso registrá, e kastigunan ku ta wòrdu imponé, e medidanan di prevenshon disponibel i e posibilidat pa fortalesé patruyage i kontrol den áreanan rural i kamindanan ku ladronisia di bestia ta frekuente. 

Sr. Carolina ke sa tambe si gobièrnu ta dispuesto pa evaluá medidanan moderno manera registrashon mas amplio i identifikashon di bestianan pa medio di chip òf otro sistema ku por yuda protehá propietarionan i fasilitá investigashonnan.

Hòrtamentu di bestia no ta solamente un delito kontra propiedat. E ta tambe un atake riba e medio di supsistensia di famianan ku ta dependé di kria bestia i trabou agríkola pa mantené nan mes. P’esei gobièrnu mester tuma e problema aki ku e seriedat ku e meresé, asina sr. Carolina ta deklará.“MFK no ta bai laga e sektor agríkola su lucha keda sin atenshon. Nos lo sigui insistí riba medidanan konkreto pa oumentá seguridat, fortalesé kontrol i garantisá ku agrikultor i kriadónan di bestia por sinti nan mes mas protehá,” asina parlamentario Juniël Carolina ta mustra.

“Ora ladron ta pèrdè miedu, hende honesto ta pèrdè konfiansa; p’esei lei mester protehá esnan ku ta traha.”, Asina sr. Carolina ta finalisá.

 

Juniël Carolina

Parlamentario pa

Frakshon di MFK