Parlamento di Kòrsou Enkuentro ku “Councilwoman”, Andrea Bough, di siudat di Kansas.

Durante e kombersashon a toka diferente reto ku e siudat di Kansas i Kòrsou tin en komun, apesar di e diferensia den grandura. E siudat di Kansas tambe a konosé un desaroyo ekonómiko enorme durante e último 15 añanan, kual a yuda hasi posibel ku nan por ta un dje siudatnan anfitrion di Kopa Mundial 2026. Di otro banda e desaroyo aki tabatin konsekuensia manera por ehèmpel, preisnan di kas pa e siudadano komun i koriente, ku a subi drástikamente.

Otro tópikonan ku a papia riba dje tabata:

– Retonan ku un legisladó ta topa den trabou. Un ehèmpel ku a bini dilanti ta ku sra. Bough ta traha riba nivel di siudat (City) i hopi biaha no ta logra konkretisá su metanan pa e pueblo, pa motibu ku riba nivel di estado (State) ta hiba un otro polítika ku no ta kuadra ku esun di dje;

– maneho pa un pueblo ku ta birando mas bieu. Kon por hasi pa mantené e seguridat sosial ku nos konosé na Kòrsou pa e grupo mayor di edat ku ta kresiendo;

– maneho ekonómiko stratégiko enbes di un maneho reaktivo. No keda kana tras di e echonan pa wak kon ta dil ku situashonnan ku presentá, pero planiá delantá e direkshon ku ke hiba e pais.

Palabrashon

Mirando e interes ku sra. Bough ta mustra pa kolaborá den futuro ku Kòrsou, lo mantené e kontakto i kuminsá interkambiá di informashonnan ku ya tin. Presidente di Parlamento lo ekstendé un invitashon na e legisladó pa bini Kòrsou i sigui traha riba e base di kolaborashon ku a keda kreá.