Riba prome dia di tratamento di Presupuesto 2022: Minister Maduro ta entrega un Nota di Cambio cu un deficit mas reduci Compara cu aña 2021, e deficit ta baha cu 306 miyon florin
Riba prome dia di tratamento di Presupuesto 2022:
Minister Maduro ta entrega un Nota di Cambio cu un deficit mas reduci
Compara cu aña 2021, e deficit ta baha cu 306 miyon florin
ORANJESTAD – Diaranson Parlamento a cuminsa trata Presupuesto 2022. Despues cu Minister Maduro di Finansa a entrega e presupuesto na Parlamento dia 22 di februari ultimo, a surgi algun cambio pa cual cu mester bin cambio corespondiente den e presupuesto presenta. Pa haci e cambionan aki posibel, riba e prome dia di tratamento di presupuesto Minister Maduro a presenta un Nota di Cambio.
Deficit ta baha cu 300 miyon florin
Den e Nota di Cambio e deficit presenta di 291,3 miyon ta wordo baha cu 63,8 miyon florin y e deficit nobo ta yega na 227,5 miyon florin. Compara cu e 534 miyon florin realisa na deficit den aña 2021, esaki ta un rebaho substancial di 306,5 miyon florin.
A haci cambio pa por cumpli miho cu recomendacionnan di CAFT
Den Presupuesto 2022, Gobierno a tene debido cuenta cu e recomendacionnan di CAFT y Raad van Advies y a describi esaki den e Nota di Splicacion cu ta compaña e Presupuesto. Tabata tin algun recomendacion di CAFT cu a tuma mas tempo pa elabora riba nan tecnicamente y den e Nota di Cambio, Gobierno a haci algun cambio pa por a cumpli miho cu e recomendacionnan di CAFT. Asina por mira cu den e Nota di Cambio a baha e post di Servicio y Producto cu 12,9 miyon florin y ta baha e gasto aki di 226 pa 213 miyon florin. Di e manera aki ta cumpli miho cu recomendacion number 1 di CAFT pa baha e suma presupuesta pa Servicio y Producto. Pa cumpli cu recomendacion number 5 di CAFT, a inclui 3,1 miyon florin di ganashi di Setar di aña 2021 y 49 miyon florin di e subsidio di salario cu ta wordo cobra via SVB.
