Orashon djarason 12 di aprel 2017

Orashon djarason 12 di aprel 2017

E ora ei un di e diesdos apòstelnan, yamá Hudas Iskariot, a bai serka e saserdotenan importante i bisa nan: ‘Kuantu boso ta duna mi pa entreg’É na boso?’ Nan a pag’é trinta moneda di plata. For di e momento ei Hudas a kuminsá buska un momento oportuno pa entregá Hesus. Riba promé dia di fiesta di Pan sin Zürdeg, Hesus su disipelnan a bin puntr’É: ‘Unda Bo ke nos prepará sena di Pésag pa Bo kome?’ Hesus a bisa nan: ‘Drenta siudat, bai serka tal i tal persona i bis’é: “Maestro ta bisa: Mi tempu a yega, serka bo mi ta tene sena di Pésag ku mi disipelnan.” ’ E disipelnan a hasi manera Hesus a manda nan i a prepará e sena di Pésag. Ora a bira nochi, Hesus i su diesdos disipelnan a sinta kome. Miéntras nan tabata kome, Hesus a bisa: ‘Mi ta sigurá boso: ún di boso lo traishoná Mi.’ E disipelnan a bira mashá fèrdrit i un tras di otro a kuminsá bis’É: ‘N’ t’ami sí, no Señor!’ Ma Hesus a kontestá nan: ‘Esun ku dòp su pan den skalchi huntu ku Mi, lo traishoná Mi. Sí, manera ta skibí den Skritura, Yu di hende mester bai, ma ai di e hende ku traishon’É! Ta mihó pa e hende ei, si nunka e no a nase mes!’ Hudas, esun ku a traishon’É, a puntr’É: ‘Por t’ami, Maestro?’ Hesus a bis’é: ‘Manera bo di!’
Mateo 26:14‭-‬25