A brinda asistensia na pasaheronan venezolano na Curaçao International Airport

Willemstad – Djárason, 24 di yüni tabatin dos teremoto ku a kousa hopi daño na Venezuela. E teremotonan akí tabatin komo konsekuensia ku un avion ku a sali for di Spaña rumbo pa Venezuela, no por a aterisá na Venezuela mas riba djárason. Mirando ku e avion no por a regresá bèk Spaña na e momento ei, e avion a baha na Kòrsou ku un total di 350 pasahero. Bou di kordinashon di tim di krísis, i huntu ku otro organisashonan, Kòrsou a duna asistensia na e grupo di pasaheronan ku a keda pegá na Kòrsou debí na e situashon na Caracas, Venezuela.

Minister Shalten Hato den su kalidat di visé promé minister, a enkargá kordinador nashonal di krísis pa kordiná e asistensia na e grupo di pasaheronan venezolano. Konhuntamentu ku organisashonan manera entre otro Rode Kruis, CAP, Kuerpo Polisial Kòrsou, Venex i boluntarionan, a logra haña alohamentu pa tur pasahero ku a keda Kòrsou i den nesesidat di asistensia. Entre e pasaheronan venezolano na Kòrsou, tabatin un grupo deportivo di 14 mucha menor di edat huntu ku nan guianan. A haña koperashon di un resort pa por a akomodá e grupo aki. Sobrá pasaheronan a risibí alohamentu serka un boluntario ku a yuda aproksimadamente 10 persona i 44 pasahero a bai un otro lokashon. Alrededor di 160 pasahero a biaha di regreso pa Spaña.

Un danki na un i tur ku a duna asistensia pa por brinda alohamento na e pasaheronan aki. Gobièrnu di Kòrsou ta deseá forsa na nos bisiña Venezuela i e komunidat venezolano na Kòrsou.