Kòrsou Avivá djasabra anochi riba Brionplein huntu ku Stephen Evans for di Estados Unidos

 

Willemstad– Djasabra awor 4 di yüli pa 7’or di anochi Brionplein lo bira e sentro di un gran movementu spiritual. Mas ku 20 iglesia a uni pa organisá “Kòrsou Avivá”, un evento ku tin komo meta pa uni e kurason di e komunidat di Kòrsou den orashon, adorashon i avivamentu. 

 

Ademas di e gran sosten di iglesia lokal, 40 mishonero internashonal tambe a yega Kòrsou pa forma parti di e evento aki i pa hasi trabounan mishonero den diferente bario aki na Kòrsou.

 

E oradó prinsipal di e anochi ta Evangelista Stephen Evans, for di Estados Unidos, konosí pa su ministerio di evangelisashon, fe i yamada pa avivamentu spiritual. Su mensahe ta inspirá míles di persona na diferente parti di mundu pa rekonektá ku nan Kreador i haña speransa den Kristu-Hesus.

 

E programa lo konta tambe ku alabansa di Zamar i Proskuneo, Biña Nobo i Cielos Abiertos Musical. Públiko por spera un anochi di alabansa, transformashon, sanashon i renobashon spiritual. Esnan ku tin deseo pa batisá tambe por hasi esaki riba e dia aki. 

 

Durante e evento bishitantenan por pasa na “Hope Station” kaminda mucha te ku hende grandi di un forma bunita i atraktivo por risibí e mensahe di speransa pa medio di Kristu-Hesus.

 

Mesa di Apòstel i CIEIC ta hasi un yamada na pueblo di Kòrsou kompleto, sin importá denominashon, pa bin forma parti di e momento aki di unidat, fe i speransa.

 

Tur hende ta bon biní djasabra awor pa 7’or di anochi riba Brionplein. No pèrdè e oportunidat pa eksperensiá un movementu di avivamentu spiritual riba Kòrsou.