Diskurso di Minister van Heydoorn na okashon di Día di Himno i Bandera di Kòrsou 2026

Distinguido outoridatnan, representantenan di pueblo, invitadonan spesial i siudadanonan di Kòrsou:

Nos ta reuní riba e dia akí, 2 di yüli, ku rèspèt profundo i sentido di patria pa konmemorá Dia di Himno i Bandera di Kòrsou.

Ta un fecha ku ta okupá un lugá spesial den memoria i kurason di nos pueblo.

Himno i bandera, no ta solamente símbolonan ofisial.

Nan ta ekspreshon visibel i sonoro di nos identidat, nos historia i nos dignidat komo nashon.

Den nan tin refleho di e lucha, e soñonan, e sakrifisionan i e speransa di generashonnan ku a kontribuí na konstruí e Kòrsou ku nos ta stima i nos ta defendé.

Ora nos mira nos bandera waya bou di shelu di nos isla, esaki ta kòrda nos riba e forsa di nos pueblo, e beyesa di nos tera i e unidat ku mester guia nos mas leu ku tur diferensia.

Ora nos himno zona ku rèspèt, manera na inougurashon di ‘Kopa Mundial’ di e aña akí, e ta mishi ku nos alma, e ta elevá nos kompromiso ku e balornan ku ta sostené nos konbibensia:

Esta libertat, responsabilidat, solidaridat i amor pa Kòrsou.

Na e okashon solèm akí nos ta rindi homenahe na tur esnan ku a traha i ta trahando ku vishon i pashon, esnan ku a fortalesé nos identidat kultural i nashonal.

Nan legado i dedikashon ta invitá nos pa mira futuro ku konfiansa, pero tambe ku responsabilidat.

Komo pueblo, nos tin e deber di protehá loke ta uni nos.

Nos tin e deber di transmití pa e generashonan benidero, nifikashon profundo di e símbolonan di nos patria.

I nos tin e deber di konstruí, huntu, un pais kaminda kada siudadano ta sinti ku e ta konta, ku e ta respetá i e ta yamá pa kontribuí na bienestar general di tur hende.

Laga e Dia di Himno i Bandera akí ta un oportunidat pa reafirmá nos unidat, nos dignidat i nos speransa.

Laga ku ora nos hisa kara mira nos bandera i skucha nos himno, nos kòrda ku Kòrsou ta mas ku e lugá kaminda nos ta biba: Kòrsou ta nos kas, nos herensia i nos destino kompartí.

Ta p’esei ban stima mas, ban konstruí mas.

Ban skohe pa un kambio di mentalidat, kaminda ku sensashonalismo i negativismo no ta prioridat.

Un mentalidat pa yuda sigui sirbi i krea un base sólido pa un Ola Blou ku no lo muri nunka mas.

Un Ola Blou ku lo trese pa nos mas ekonomia, mas turismo i mas prosperidat

Biba Kòrsou!!!