Invitashon na komunidat pa pensa huntu riba Lei General di Derecho Atministrativo

Willemstad – Kòrsou ta dal un paso importante den e desaroyo di bon gobernashon i seguridat hurídiko. Riba inisiativa di Komishon ‘Algemene regels bestuursrecht’ (Reglanan General di Derecho Atministrativo), e konsepto di e ordenansa Reglanan General di Derecho Atministrativo (Landsverordening Algemene regels bestuursrecht, Alb) a finalisá. Ku aprobashon di Minister di Hustisia, e konsepto aki ta keda ofresé pa un konsulta públiko riba internèt.

E ordenansa Reglanan General di Derecho Atministrativo ta kontené reglanan general pa kondukta di órganonan atministrativo. E ordenansa di Reglanan General di Derecho Atministrativo ta un implementashon di artíkulo 89, insiso 2 di e Konstitushon di Kòrsou. E lei aki tin komo meta entre otro kontribuí na un gobièrnu mas uniforme, fortifiká protekshon di derechi di e siudadano, i stipulá un kuadro normativo atministrativo pa supervishon, ehekushon i delegashon.

Komo ku e ordenansa aki ta di gran nifikashon pa siudadanonan i instansianan di gobièrnu, a disidí pa tene un konsulta públiko online pa e konsepto di lei aki. Asina ta duna oportunidat na tur siudadano pa revisá e konsepto i pa entregá nan komentario, sugerensia òf punto di atenshon. E konsepto di lei, e memoria di splikashon i informashon tokante e konsulta ta disponibel via: https://gobiernu.cw/internetconsultatie-alb

Reakshon por keda entregá pa mas tarda 1 di sèptèmber 2026 via di: consultatiealb@gov.cw.

E reakshonnan risibí lo keda inventarisá i evaluá dor di ekspertonan i kaminda ta nesesario i relevante, inkorporá den e konsepto. Despues di e konsulta, e konsepto lo drenta e trayekto legislativo kaminda e lo ser entregá na Konseho di Minister pa aprobashon. Despues di aprobashon di Konseho di Minister lo entregá e konsepto na Konseho di Konsulta (Raad van Advies) pa konseho. E konsehonan i rekomendashonnan di e Konseho di Konsulta lo ser inkorporá den e konsepto. Pa finalisá e trayekto legislativo lo entregá e konsepto na Parlamento pa konsiderashon. Den kuadro di un maneho mas aksesibel pa e siudadano lo tradusí e ordenansa na Papiamentu tambe.

Na nòmber di Gobièrnu di Kòrsou, Minister di Hustisia ta invitá siudadanonan, organisashonan i otro interesadonan pa partisipá na e konsultá públiko via internèt i yuda pensa kon pa sigui desaroyá nos derechonan atministrativo. Un danki na e Komishon ‘Algemene regels bestuursrecht’ i e ekspertonan enbolbí ku a kontribuí na kreashon di e konsepto aki.