Tópiko: 1. Implementashon di lei di Bion pa polis   2. Sanea debe di polis  

Presidente di Parlamento di Kòrsou  

Sr. F. Brownbill  

Wilhelminaplein 4  

6 yuli 2026  

Apresiabel sr. Brownbill,  

Pa medio di e karta aki mi ta pidi bo pa dirigí e karta athunto na Minister di Hustisia i  Minister di Maneho di Gobernashon, Planifikashon i Servisio Públiko, sr. Shalten Hato i  Minister di Finansa sr Charles Cooper.  

Danki pa e koperashon.  

Atentamente,  

Mr.drs. Javier Silvania,  

Parlamentario pa  

frakshon di MFK 

Minister di Hustisia i Minister di Maneho di Gobernashon, Planifikashon i Servisio  Públiko, sr. Shalten Hato i Minister di Finansa sr. Charles Cooper  

Willemstad, 6 yuli 2026  

Tópiko: 1. Implementashon di lei di Bion pa polis  

2. Sanea debe di polis  

Apresiabel minister,  

  

Suskrito, miembro di frakshon di Movementu Futuro Kòrsou den Parlamento di Kòrsou,  mr.drs. Javier Silvania, ta pidi bo atenshon pa e siguiente problemanan ku ta afektá nos  kuerpo polisial.  

Parlamento a aprobá dia 6 mart 2025 e Lei di Bion. Lei di Bion ta un inisiativa di partido  MFK. Riba overtaim e trahadó ta paga 46,5% maksimal na loonbelasting. E peso altu di  belasting aki ta demotivá trahadónan pa traha overtaim. Mas ku mitar di e pago di  overtaim ta bai pa belastingdienst. Lei di Bion ta konta pa trahadónan den sektor públiko.  Pero tambe pa trahadónan den sektor priva manera supermarket, horeca, limpiesa,  security etcetera.  

Den kuerpo di polis tin malkontentu bou di trahadónan ku no a haña eksonerashon.  Gobièrnu a kita loonbelasting i prima di seguro sosial riba nan sèn di overtaim. Ministerio  BPD a informá e polisnan ku Lei di Bion no ta apliká pa nan. E polisnan ta di opinion ku  durante kampaña pa e último elekshon diferente polítiko di MFK a krea e impreshon ku  nan tambe ta bin na remarke pa eksonerashon.  

Den e Lei di Bion ta regla ku un trahadó por traha 40 ora pa luna overtaim sin paga  belasting. E eksonerashon aki ta konta basta ku e entrada anual bruto (bruto  jaarinkomen) ta ménos ku Cg 85.753,20. Pa kalkulá e entrada anual bruto ta konta e  salario, vakantiegeld i gratificatie huntu. Overtaim òf un ‘standby toelage’ no ta forma  parti di e entrada anual bruto pa kalkulá si e trahadó ta pasa e límite di Cg 85.753,20.  

Art. 3 insiso 2 Arbeidsregeling 2000 ta duna un definishon di entrada anual bruto i ta bisa  lo siguiente:  

“Voor de toepassing van deze landsverordening en de daarop berustende bepalingen  wordt onder inkomen verstaan: alle inkomsten uit arbeid in één onderneming, waaronder  mede begrepen het naar tijdruimte vastgestelde loon, het vakantiegeld, provisie en  winstbonussen en dergelijke, die als grondslag dienen voor de inkomstenbelasting, met  uitzondering van de vergoeding voor overwerk en de toeslag, bedoeld in artikel 11,  negende lid”. 

Ora un trahadó su entrada anual bruto ta mas ku Cg 85.753,20 e no ta bin na remarke pa  eksonerashon di belasting riba overtaim.  

Komo eks minister di finansa i eksperto di belasting Silvania kier duna minister Cooper i  Hato konseho kon pa solushoná e problema aki. Silvania ta presentá 2 opshon pa  solushoná e problema aki. Ta keda na e minister kua opshon e ta skohe.  

Solushon 1  

Art. 9 di Lei di Bion ta un asina yama ‘hardheidsclausule’. Art. 9 ta duna minister di  finansa e poder pa desviá di e lei di Bion i solushoná un situashon inhustu pa un grupo di  trahadó ora apliká lei al pi’e de la letra. Art. 9 ta bisa lo siguiente:  

“De Minister van Financiën kan voor zoveel nodig in overeenstemming met de Minister  van Sociale Ontwikkeling, Arbeid en Welzijn na overleg met de Inspecteur bij de  toepassing van deze landsverordening voor bepaalde gevallen of groepen van gevallen  tegemoet komen aan onbillijkheden van overwegende aard”.  

Promé ku minister Silvania a publiká e lei di Bion a pidi konseho di Ontvanger, Inspekshon  di impuesto, Sector Fiscale Zaken, Ministerio di Finansa, departamento di ‘Wetgeving en  Juridische Zaken’ (WJZ) i Raad van Advies. Ora ku parlamento aprobá un inisiativa di lei  gobièrnu no por kambia nada mas den e lei. E minister por skohe pa publiká e lei òf keda  sin publiká. Aunke ku e lei di Bion tin algun defisiensia den dje minister Silvania a skohe  pa respetá deseo di parlamento i publiká e lei. Basa riba e konsehonan risibí minister  Silvania tabata sa ku algun puntonan den e lei mester wòrdu formulá otro. Silvania tabata  sa ku e ‘hardheidsclausule’ lo duná e espasio pa solushoná e defisiensianan den  ehekushon di lei di Bion.  

Nos ta referí na e konseho fecha 10 aprel 2025 di departamento di ‘Wetgeving en  Juridische Zaken’ (WJZ) riba aplikashon di e ‘hardheidsclausule’. Den e lei di Bion ta pone  ku ta e doño di trabou so por pidi eksonerashon pa e trahadó na belastingdienst. E  departamento hurídiko di gobièrnu ta mustra minister di finansa riba e posibilidat pa  apliká e ‘hardheidsclausule’ i minister por laga e trahadó tambe hasi e petishon pa  eksonerashon. Pasobra tin doño di trabou ku ta di mala fe i ta keda sin hasi petishon pa  eksonerashon pa su trahadó. Ku otro palabra e ‘hardheidsclausule’ ta duna minister di  finansa e poder pa desviá di lei pa solushoná un problema den ehekushon di e lei.  

Dor di apliká e ‘hardheidsclausule’ minister Cooper por sòru pa un grupo mas grandi por  bin na remarke pa eksonerashon riba overtaim.  

Solushon 2  

Promé ku minister Silvania a baha ela laga traha un konsepto di lei pa modifiká lei di Bion  i saka e defisiensianan ku tin den e lei aktual. Den e konsepto di lei aki a tene kuenta ku  e konsehonan di Ontvanger, Inspekshon di impuesto, Sector Fiscale Zaken,   

departamento di ‘Wetgeving en Juridische Zaken’ (WJZ) i Ministerio di Finansa. Dor ku  Silvania mester a baha komo minister e no a haña e oportunidat pa bai konseho di  minister pa aprobá e konsepto di lei aki. SER i Raad van Advies ainda mester duna advies  promé ku minister di finansa por manda e lei parlamento. Den práktika ta dura dos aña  promé ku kambio di un lei wòrdu aprobá pa parlamento. Pa no pèrdè tempu balioso  Silvania ta konsehá minister Cooper pa bin parlamento ku un aanschrijving i pidi sosten  di parlamento. Si parlamento sostené minister Cooper e por implementá e kambio di  maneho mesora. Ora preis di gasolin a subi na 2022 den un siman Silvania a bai Staten  ku un aanschrijving bou brasa. Un i tur por kòrda kon Silvania a pidi Staten sosten pa kita  un schakel di OB riba gasolin. Silvania a haña sosten wall to wall di parlamento i mesora  preis di gasolin a baha ku 24 sèn pa liter. Silvania a goberná ku kurashon. Silvania si ta  sinti doló di pueblo i ta aktua na bienestar di pueblo.  

Gobernashon ta kontinuashon. Konsiderando tur esaki, Silvania, hasiendo uso di  artíkulo 96 di Reglamentu di Òrdu di Parlamento, ta hasi e siguiente preguntanan:  

1. Minister Cooper tin pensa di hasi uso di e ‘hardheidsclausule’ di art. 9 Lei di Bion  (solushon 1)?  
2. Minister Cooper tin pensa di entrega na parlamento un ‘aanschrijving’ pa modifiká  lei di Bion (solushon 2)?  
3. Si e kontesta riba pregunta 1 òf 2 ta positivo. Den ki término di tempu minister ta  bai hasié?  
4. Si e kontesta riba pregunta 1 òf 2 ta negativo. Kon minister Cooper i minister Hato  ta bai solushoná e problema di e polisnan ku no a haña eksonerashon di  belasting?  

Problema finansiero  

Vários polis a aserka Silvania dor ku nan tin hopi debe ku nan no por paga. Silvania ta na  altura di kasonan kaminda a pone beslag riba salario i outo. Kas di polis a wòrdu bende  na findishi. Integridat den kuerpo polisial mester ta altu. Polis ku problema finansiero  grave ta vulnerabel pa soborno, froude, ladronisia i chantage. Un polis ku problema  finansiero grave por kai den tentashon i bende informashon konfidensial pa sèn. Òf hòrtá  600 kilo di droga bou di nanishi di minister di Hustisia.  

5. Ki maneho minister Hato tin pa yuda polisnan ku tin problema finansiero grave?  6. Minister Hato tin un indikashon ta kuantu polis tin problema finansiero grave?  

Teniendo kuenta ku kosto di bida a subi. Si minister Hato no yuda e polisnan aki nan  situashon ta bai bira mas grave. Silvania kier proponé minister Hato pa e bin ku un  proyekto piloto pa yuda polisnan sanea nan debenan. Nos ta konsehá minister Hato pa  krea un fondo sosial di 2 mion pa yuda polis ku problema finansiero grave. Start un  trayekto kaminda ku e polis durante un aña i mei ta sanea su debenan ku yudansa di  gobièrnu. Diferente tipo di yudansa ta nesesario por ehèmpel budgetcoaching, un fiansa    

sin interes òf un donashon pa e polis por kanselá su debe na banko. Loke nos ta proponé  ta algu ku na Hulanda tin pa kuerpo polisial. No tin mester inventá wiel.  

Basa riba e eksperensia ku e proyekto piloto aki despues minister por ampliá pa  duaneronan, seladornan na prisòn i demas trahadónan.  

7. Kiko minister Hato ta pensa di e proposishon di Silvania pa krea un fondo sosial  pa yuda polisnan ku problema finansiero grave?  

Silvania ta apresiá si minister Cooper i Hato por duna kontesta riba e preguntanan hasí  por eskrito den un término rasonabel.  

Atentamente,  

Mr.drs. Javier Silvania,  

Parlamentario pa  

frakshon di MFK