“Mas Aleu ku Éksito”: Un invitashon pa deskubrí Dios Su propósito den éksito i prosperidat

“Mas Aleu ku Éksito”: Un invitashon pa deskubrí Dios Su propósito den éksito i prosperidat

Kiko ta éksito segun Dios? Ta e pregunta sentral di e charla inspirador “Mas Aleu ku Éksito”, ku lo tuma lugá Djadumingu 19 di yüli, pa 9:30 di mainta, na LCDC Center, Weto 95.

Pastor Widney Martha di Life Changers Ministries a invitá empresaria, Business Consultant i Coach Finansiero, Nevita Mezas, pa kompartí su testimonio personal i e lesnan ku Dios a siñ’e den su trayekto di e último 15 aña: for di empleado pa empresaria, den su buskeda pa stabilidat finansiero.

Segun Pastor Martha, den nos bida kristian no ta sufisiente pa solamente buska prosperidat. Dios ta yamá nos pa bira bon mayordomo, ku sa kon pa manehá i protehá tur loke El a pone den nos man: nos talento, nos finansa, nos negoshi i nos responsabilidat. Prosperidat no ta un meta den su mes; Dios ta bendishoná nos pa por expande Su Reino i pa nos por ta un bendishon pa otronan.

Den e charla, Nevita Mezas lo kompartí kon Dios a transformá su manera di pensa tokante trabou, negoshi, finansa i éksito. Inspirá pa Isaías 55:8, e mensaje lo mustra kon Dios Su pensamentunan ta diferente for di esunan di hende i kon siguiendo Su prinsipionan por trese un bida ku tin propósito i direkshon.

Durante e mainta tambe lo tin atenshon pa prinsipionan bíbliko tokante trabou i vokashon, liderazgo, prosperidat, bon mayordomia i konfiansa den Dios komo e úniko Fuente di tur kos.

Pastor Widney Martha ta hasi un yamada na tur hende pa asistí na e sirbishi aki i skucha e mensahe ku por inspirá i transformá bida. “Nos ta warda bo. Bini i deskubrí kiko Dios tin prepará pa bo,” asina Pastor Martha ta ekspresá.

Pa mas informashon, yama òf manda un WhatsApp na 670 9626. Tur hende ta bon biní.