BONAIRE: Atrako armá na un bar situá na Bulevar Gobernador N. Debrot.

Djaluna 20 di yüli, alrededor di 00:50 or di marduga, ‘meldkamer’ sentral a risibí notifikashon tokante un atrako armá na un bar situá na Bulevar Gobernador N. Debrot.

Tres sospechoso, bistí kompletamente na pretu ku kara tapá, a drenta e bar i menasá e doñonan ku arma di kandela, mara esakinan i tapa nan boka. Nan a logra bai ku plaka kèsh, merkansia i dokumentonan personal di e doñonan di e establesimentu.

For di investigashon preliminar a resultá ku e sospechosonan a drenta e bar for di alrededor di 11:00 or di anochi di djadumingu 19 di yüli, i alrededor di 00:45 or di marduga di djaluna 20 di yüli a bandoná e sitio den direkshon di Kaya Dialma.

Kuerpo Polisial ta pidi un i tur ku por a mira òf sa algu tokante e atrako armá aki pa yama 715 8000 òf e liña di tep anónimo 9310.

Investigashon den e kaso aki ta andando.