Konfiansa ta wòrdu rekonstruí ora nos papia ku otro

Minister Charetti America: Un demokrasia fuerte ta kuminsá ora hende ta dispuesto pa skucha otro.

WILLEMSTAD – Durante e konmemorashon di 104 aña di Huelga di Haf, minister di Desaroyo Sosial, Labor i Bienestar (SOAW), Charetti America-Francisca, a presentá e dekreto di gobièrnu ku ta restablesé ofisialmente e Diálogo Nashonal Tripartito. Ku esaki, gobièrnu, dunadónan di trabou i trahadónan ta disponé atrobe di un plataforma struktural di konsulta pa huntu traha riba un merkado laboral fuerte, hustu i prepará pa e desafionan di futuro.

Pa minister Charetti America-Francisca, e restablesimentu di Diálogo Tripartito ta mas ku un desishon atministrativo. E ta konsiderá esaki komo un invershon den e kultura demokrátiko di Kòrsou.

For di su periodo komo Presidente di Parlamento di Kòrsou, e a sigui defendé e punto di bista ku un demokrasia sano no ta dependé solamente di elekshonnan i lei, sino prinsipalmente di e disponibilidat di hende i institushonnan pa sigui den diálogo ku otro, asta ora tin diferensia di interes.

“Konfiansa ta wòrdu restablesé ora nos papia ku otro. No ora nos papia di otro, sino ora nos buska otro, skucha otro i huntu tuma responsabilidat.” Segun minister, hustamente esaki ta e forsa di un demokrasia madurá.

“E mayor menasa pa un demokrasia no ta diferensia di opinion. Esakinan semper lo eksistí. E menasanan di bèrdat ta polarisashon, populismo, deskonfiansa i un kultura den kua hende no ke skucha otro mas. Ora e diálogo stòp, e kolaborashon tambe ta bin bou di preshon. P’esei nos mester sigui invertí den diálogo.”

Lèsnan di pasado
Segun minister, e konmemorashon di 104 aña di Huelga di Haf ta un momento apropiá pa tuma e paso aki. E eventonan di 1922 ta rekordá Kòrsou ku progreso sosial no ta bini solamente for di desaroyo ekonómiko, sino tambe for di dignidat, rèspèt i e posibilidat pa hende wòrdu skuchá. “Historia ta siña nos ku konfliktonan tin biaha ta inevitabel. Pero e ta siña nos tambe ku solushonnan duradero ta nase ora hende ta dispuesto pa komprondé otro, tuma konsiderashonnan ku koutela i huntu karga ku responsabilidat.” Segun minister, awendia e prinsipio aki ainda ta forma e base di bon gobernashon.

Di promesa pa maneho struktural
Poko despues di a asumí su funshon komo minister, Charetti America-Francisca a sinta papia ku representantenan di sindikatonan, entre otro Frensley Sillé i Adri Williams. Durante e reunion, e a komprometé pa duna Diálogo Tripartito un bida nobo. Ku e firma di e dekreto di gobièrnu, e promesa aki a wòrdu kumplí ofisialmente.

Pa e minister, esaki ta mustra ku bon gobernashon no ta trata di solushonnan temporal òf éksito riba término kòrtiku, sino di fortalesé institushonnan ku, tambe riba término largu, ta kontribuí konfiansa, stabilidat i desaroyo sosial-ekonómiko.

Reakshon positivo di partnernan sosial
E restablesimentu di Diálogo Tripartito a wòrdu risibí ku hopi apresio pa sindikalistanan. Lider di sindikato Adri Williams a bisa ku e desishon aki ta algu históriko. “E regalo di mas bunita ku nos por a risibí, na okashon di 104 aña di Huelga di Haf i e legado di Félix Chakuto, ta ku e gobièrnu a disidí pa pone e tripartismo funshoná atrobe.”

Minister Charetti America-Francisca ta mira e reakshon aki komo un konfirmashon ku progreso duradero ta kuminsá ku kolaborashon.

“Mi konvikshon semper ta ku institushonnan fuerte ta mas importante ku individuonan fuerte. Ora gobièrnu, dunadónan di trabou i trahadónan ta sigui topa ku otro, no solamente ta surgi un mihó maneho, sino tambe mas konfiansa den nos demokrasia. Ta riba esaki mes nos ta trahando awendia, i e generashonnan ku ta bin lo disfrutá e fruta.”

MAS NOTISIA

Ministerio konserní:Desaroyo Sosial, Labor i Bienestar