Ministerio di SOAW ta aksesibel pa tur hende

Willemstad– Ministerio di Desaroyo Sosial, Labor i Bienestar (SOAW) ta un ministerio ku ta traha tur dia pa mehorá e bienestar sosial di tur suidadano di Kòrsou. Den kualke fase di bida òf situashon di reto ku un persona òf famia por enfrentá, ministerio ta kla pa skucha, orientá i, kaminda ta posibel, brinda e sosten ku ta nesesario.
Pa medio di su diferente sektornan, SOAW ta atendé un amplio variedat di nesesidatnan sosial. Kada petishon ta keda evaluá individualmente pa determiná kua forma di sosten ta mas adequá, konforme e situashon spesífiko di e persona i e proseduranan vigente.

Por ehèmpel, ora un suidadano ta un benefisario di ònderstand, konforme prosedura, un konsulente ta ser asigná pa sigui ku e kaso. E konsulente ta sirbi komo punto figo di kontakto, ta evaluá e nesesidat aktual i ta orientá ku e persona tokante e diferente posibilidatnan di sosten ku ministerio por brinda. Dependiendo di e situashon, esaki por inkluí diferente formanan di asistensia material i sosial ku ta disponibel.

Sin embargo, Ministerio di SOAW ta rekonosé ku hopi biaha e problema nan ku famianan ta enfrentá no ta finansiero so. Tin situashonnan ku problema di trabou, edukashon, salú, relashon familiar òf kuido di mucha ta kombiná I ta rekerí un aserkamentu mas amplio. Den e tipo di kasonan aki, Sektor di Famia i Hubentut ta disponibel pa brinda guia intensivo. Un konsulente lo tuma kontakto ku e famia, evaluá henter e situashon i, huntu ku e famia, prepara un plan di akshon ku ta enfoká riba solushonnan struktural. E meta no ta solamente atendé e problema di awe, sino tambe fortalesé e famia pa por sigui dilanti ku mas stabilidat i independensia.

Ministerio di SOAW ta konsiente ku kombatimentu di pobresa i problema sosial no ta responsabilidat di gobièrnu so. P’esei ministerio ta traha den koperashon ku diferente fundashonnan, organisashonnan, iglesia i instansianan ku, dia tras dia, ta brinda sosten na famianan den nos komunidat. E koperashon aki ta di gran balor. Sinembargo, koordinashon ta sumamente importante. Ora diferente organisashonan ta yuda e mes famia sin ku tin koordinashon, por sosodé ku e famia ta risibí sosten for di diferente banda, mientras ku e kousanan ku a kreá e problema ta keda sin wòrdu atendé. Di e manera ei, e yudansa por ta aliviando e situashon temporalmente, sin resultá den un solushon duradero.

P’esei Ministerio di SOAW ta hasi apelashon na tur organisashon, fundashon, iglesia, bisiña i suidadano pa pone kaso nan na konosementu di ministerio. Ora Ministerio di SOAW ta na altura di un situashon, ministerio por evaluá e kaso den su totalidat, koordiná ku e diferente partnernan envolví i traha riba un plan di sosten ku ta evita ku e yudansa ta hasi e situashon pio. No ta nesesario pa bo konosé tur e detayenan prome ku bo tuma kontakto ku Ministerio di SOAW.
Si bo nota ku un famia, un mucha, un persona mayor òf un otro suidadano por ta den nesesidat, òf bo tin preokupashon tokante un situashon, informa Ministerio di SOAW. E profesionalnan di ministerio lo evaluá e informashon, respetando semper e privasidat, dignidat i derechonan di e personanan envolví.

Un señal na tempu por prevení ku un situashon ta bira mas serio. Si durante e evaluashon resultá ku un otro ministerio òf instansia ta mihó posishoná pa atendé e kaso, Ministerio di SOAW lo koordiná e kontaktonan nesesario pa garantisá ku e persona òf famia haña e sosten ku realmente nan mester. Ministerio di SOAW kier rekordá komunidat ku e porta ta habrí. No laga un situashon bira mas grandi promé ku bo buska yudansa. Huntu ku nos partnernan i komunidat, nos por traha pa logra no solamente asistensia inmediato, sino tambe solushonnan ku ta mehorá bida di famianan di un manera duradero.

Pa mas informashon òf reportá un situashon, por tuma kontakto ku:
Sektor Desaroyo Sosial: 724-5300
Sektor Famia i Hubentut: 724-5499
Sektor di Labor: 724-5300
Kas di Bario Dokterstuin: 724-5253
Kas di Bario Sta. Maria: 724-5252
Kas di Bario Otrabanda: 724-5253
Kas di Bario Brievengat: 724 5252
Kas di Bario Punda/Banda Ariba: 724-5251