Sektor Famia i Hubentut di SOAW ta investigá suseso ku a enbolbí menor di edat na Brionplein

WILLEMSTAD – Sektor Famia i Hubentut di Ministerio di SOAW a tuma nota di un suseso ku a tuma lugá na Brionplein, kaminda varios menor di edat, segun informashon preliminar, tabata sin supervishon adekuá di un adulto.

Seguridat, protekshon i bienestar di nos muchanan ta un responsabilidat komun i ta un prioridat pa Ministerio di SOAW. Muchanan entre 3 i 5 aña di edat ta den un fase di desaroyo kaminda nan ta sumamente vulnerabel. Nan no tin e kapasidat ainda pa evaluá peliger òf tuma desishonnan ku ta protehá nan mes. Pa esei, supervishon kontinuo di un adulto no ta solamente deseabel, sino un responsabilidat fundamental di tur persona enkargá ku nan kuido.

Artíkulo 19 di Tratado Internashonal tokante Derechinan di Mucha ta stipulá ku tur mucha tin derecho na protekshon kontra negligensia, abuso i tur otro situashon ku por pone su bienestar na riesgo. Ministerio di SOAW ta sigui komprometí na defendé e derechinan aki den tur sirkunstansia.

Den e kaso aki, Sektor Famia i Hubentut a kuminsá ku un investigashon pa rekonstruí tur echo di loke a sosodé. Den e proseso lo kolekta informashon di tur instansianan relevante ku eventualmente por a intervení òf por tin informashon tokante e suseso, pa asina por forma un bista kompleto i ophetivo di loke a tuma lugá.

Na e momento aki, SOAW lo no duna ningun deklarashon tokante e papel òf akshon di ningun instansia te ora tur informashon disponibel wòrdu evaluá. Ademas di e investigashon, Ministerio di SOAW lo evaluá si tin nesesidat pa fortalesé òf adaptá protokòlnan di koordinashon entre e diferente instanshanan ku tin responsabilidat den protekshon di mucha, ku e meta pa garantisá ku tur informashon relevante yega na e outoridatnan kompetente na tempu.

Sektor Famia i Hubentut ta probechá e oportunidat pa hasi un yamada na tur mayor i organisashonnan ku ta organisá aktividatnan pa muchanan pa semper sigurá ku tin supervishon sufisiente i prosedimentunan kla pa protehá e menor di edatnan ku ta bou di nan responsabilidat.

Personanan ku tin preokupashon tokante e seguridat di un mucha òf ku ta testigu di un situashon kaminda un menor di edat por ta den peliger, ta wòrdu supliká pa tuma kontakto ku Polis si tin un situashon di emergensia, òf ku Sektor Famia i Hubentut di Ministerio di SOAW na 724-5499. pa por evaluá e situashon i tuma e medidanan nesesario.

Ministerio di SOAW ta reafirmá su kompromiso pa sigui traha huntu ku tur instansha relevante pa garantisá ku tur mucha na Kòrsou por krese den un ambiente sigur, protehá i ku e kuido ku nan meresé.

Pa mas informashon òf den kaso di otro kasonan konstatá, tur mayor òf siudadano por tuma kontakto ku polis si tin peliger inmediato pa e mucha òf ku Sektor Famia i Hubentut di Ministerio di SOAW na 724-5499