Pa por transportá hende i kobra pa esaki, bo tin mester di pèrmit

Willemstad – Servisio pa Tráfiko i Transporte (UOVV) ta informá ku tur persona ku ta ofresé servisio di transporte públiko i ta risibí pago pa esaki, por hasi esaki únikamente si nan tin un pèrmit otorgá pa Gobièrnu di Kòrsou.

Operá un negoshi di transporte pagá di persona sin e pèrmit rekerí ta un violashon di lei i ta kastigabel. E sistema di pèrmit no ta solamente pa kumpli ku e lei, si no, tambe pa protehá pasahero, garantisá miho servisio i promové un kompetensia hustu entre tur operador legal.

UOVV ta sigui monitoriá e situashon i ta traha den estrecho kolaborashon ku sektor turístiko, Kuerpo Polisial Kòrsou i Projectteam Toezicht en Handhaving (PTH) pa asina por identifiká i tuma akshon kontra tur forma di transporte ilegal.

VVRP a tuma nota di diferente promoshon riba medio sosial i aplikashon manera Uber, ku ta ofresé transporte si pèrmit rekerí. Ta importante pa komunidat sa ku ‘Uber’ no ta reglá den e leinan di Kòrsou. Konsekuentemente, tur transporte pagá di persona ofresé via e plataforma akí ta ilegal.

VVRP ta hasi un yamada na tur hotèl, empresa den sektor turístiko, operador, i komunidat en general pa no hasi uso di servisionan ilegal, i pa denunsiá kualke aktividat sospechoso na Kuerpo Polisial Kòrsou òf na PTH.

Persona òf empresanan ku ta interesá den operá legalmente por tuma kontakto ku UOVV via WhatsApp na +5999 527 8244 òf manda un mail na tp.uovv@gobiernu.cw.

UOVV ta sigui komprometé i garantisá un sektor di transporte ku ta sigur, ordená i konforme ku leinan vigente.