Hóbennan a siña tokante Siensia i Naturalesa durante siman di aktividatnan práktiko organisá pa Micro Mondi i UNESCO Curaçao

Hóbennan a siña tokante Siensia i Naturalesa durante siman di aktividatnan práktiko organisá pa Micro Mondi i UNESCO Curaçao

 

WILLEMSTAD – Un grupo di hóben (7-15 aña) a partisipá na un siman yen di aktividatnan edukativo i práktiko, kaminda nan a siña tokante meteorologia, siensia ambiental, konservashon di naturalesa i téknikanan di supervivensia. 

E programa a kombiná teoria ku práktika pa stimulá interes den siensia i kuidamentu di medio ambiente, bou di hóben. Micro Mondi ta un programa edukativo, sostené pa Komishon Nashonal di UNESCO Curaçao ku e meta prinsipal pa hóben komprondé e importansia di tera, awa i mata i ki influensia esaki tin riba nos forma di biba.

 

E siman a kuminsá djaluna kaminda e partisipantenan a risibí instrukshon riba kon pa kòrta glas di un manera sigur i traha un “rain gauge”, un instrumento pa midi kantidat di yobida. Despues, nan a usa e instrumentonan pa kolektá awa di yobida, ku intenshon di analisá e muestranan huntu den e dianan siguiente.

 

Djamars, e hóbennan a partisipá den un “Nursery Challenge”, kaminda nan a kompetí pa produsí material útil pa un “nursery”. Nan a kose sakunan pa simia i a traha kopianan di papier-maché pa mata i palunan. Na final di e aktividat, e grupo mes a vota pa skohe e trabounan ku tabata mas kreativo, bunita i bon ehekutá.

Riba djárason, e partisipantenan a siña kon pa usa diferente instrumento sientífiko pa midi kalidat di awa. Ora ku tabatin muestranan di yobida disponibel, nan a tèst e awa kolektá den nan “rain gauge”. Tambe a hasi análisis di tera pa evaluá si e tera tabata apropiá pa planta den e bakinan ku a traha un dia promé.

 

Djaweps, e grupo a prepará diferente ekipo pa trabou den tereno, inkluyendo palunan pa tuma muestra i un “Secchi disk”, un instrumento ku ta midi e transparensia i klaridat di awa. A usa e ekiponan aki pa e ekskurshon ambiental.

Djabièrnè, e programa a kulminá ku un dia afó na Boka Sami. Akí e partisipantenan a pone den práktika tur loke nan a siña durante e siman tumando muestra, hasi opservashonnan ambiental i tèst kalidat di awa ku e ekiponan ku nan mes a traha.

 

E siman a terminá djasabra ku un aktividat spesial den kua e hóbennan a siña kon pa sende kandela den un ambiente kontrolá i bou di supervishon. Despues di esaki, tur hende a reuní rondó di un kampvur pa reflehá riba e eksperensianan di e siman i selebrá e konosementu i abilidatnan nobo ku nan a desaroyá. Kada partisipante a risibí un sertifikado komo prueba di nan partisipashon na e proyekto piloto akí.