Pòst di Brantwer Barber ta muda temporalmente pa Fontein den kuadro di renobashon di Pòst di Brantwer Barber

WILLEMSTAD.- Brantwer Kòrsou ta informá ku for di djamars 21 di yüli, Pòst di Brantwer Barber lo muda temporalmente pa Fontein naast 30. E mudansa ta nesesario pa motibu di e trabounan di renobashon di e edifisio di Pòst di Brantwer Barber.
Ta antisipá ku e trabounan di renobashon lo tin un durashon di mas òf ménos dies luna. Ku e mudansa temporal aki, Brantwer Kòrsou ta sigui garantisá kontinuidat di su servisio di emergensia pa e área di Bándabou. Personal di Brantwer Kòrsou, ku sosten di vários departamentu den e organisashon, ta enkargá ku e mudansa. Brantwer Kòrsou ta ekspresá su apresio pa e koperashon i fleksibilidat di tur empleado ku a/lo kontribuí na un transishon efisiente pa e lokalidat temporal.

Brantwer Kòrsou ta ekspresá tambe un danki spesial na tur organisashon ku a brinda nan koperashon durante e proseso di mudansa, ku ta permití sigur ku Brantwer Kòrsou por sigui garantisá servisio den situashon di emergensia. Un danki spesial na UOOW ku a duna un man pa drecha e fasilidatnan na Fontein pa asina e ekiponan pisa di Brantwer Kòrsou por maniobra i por ta aksesibel na tur momentu for di e lokalidat temporal aki.

Servisio di Brantwer Kòrsou ta keda kompletamente disponibel pa públiko 24 ora pa dia, 7 dia pa siman, durante e trabounan di renobashon. Habitantenan di Bánda bou por ta trankil ku e servisio ta kontinuá sin interupshon.

Brantwer Kòrsou ta keda komprometé na protehá bida i propiedat ku un servisio profeshonal, sigur i di kalidat haltu pa hinter komunidat.

Prevení, Prepará i Sirbi