Kòrsou ta hasi donashon di tres bui pa atrahé piská (FAD) na St. Maarten  

Kòrsou ta hasi donashon di tres bui pa atrahé piská (FAD) na St. Maarten  

Willemstad – Kòrsou tin un proyekto di FAD bastante eksitoso i na añanan 2025 i 2026 ya a instalá 23 FAD den e awanan di Kòrsou. 

 

Riba petishon di sra. Grisha Heyliger- Marten, Minister di Turismo, Asuntunan Ekonómiko, Tráfiko & Telekomunikashon (TEATT) di St. Maarten, Promé Minister Gilmar Pisas, Minister responsabel pa Agrikultura, Medio Ambiente, i Naturalesa di Ministerio di GMN, a kumpli ku e petishon i a regalá tres FAD na St. Maarten pa nan desaroyá nan sektor di piskamentu. Nos ta paisnan den Reino i komo tal nos ta koperá ku otro i esaki ta un di e ehèmpelnan.

 

Na novèmber 2025 a prepará e FAD’s. E buinan di FAD aki a wòrdu fabriká aki na Kòrsou for di komienso di aña. Entretantu ya TEATT a manda e posishonnan, profundidat i numbernan di MMSI di e FAD’s pa programá esakinan den e AIS’s. 

Pa yuda guarantisá seguridat di nabegashon i evitá dalmentu di barku den e FAD’s tur FAD ta ekipá ku lus ku ta sende anochi, radar reflektor i AIS. AIS (Automatic Identification System) ta un sistema di rastreo ku barkunan sa uza pa transmití i risibí informashon tokante barkunan den bisindario. E ta traha manera un “marine GPS sharing system” kaminda kada barku ta manda su posishon i detayesnan i otro barku i stashon na kosta por risibí esakinan. AIS ta kompartí nòmber di barku i number di identifikashon di pais, posishon, velosidat, direkshon i tipo di barku i kada AIS tin su number di identidat úniko, e Maritime Mobile Service Identity (MMSI).   

 

Dia 16 di yüli 2026 a transportá e FAD’s for di e depósito di Gobièrnu na Mathey Werf pa Mijnmaatschappij New Port na Fuikbaai dor di empleadonan di Departamentu di Agrikultura i Maneho di Peska (AVB) di e Ministerio di GMN. Lo transportá e FAD’s pa St. Maarten ku un di e lanchanan ku ta transportá santu i greis di Mijnmaatschappij. 

 

Djadumingu último den presensia di Promé Minister Gilmar Pisas a pone e FAD’s riba barku i esaki lo yega St. Maarten dia 28 di ougùstùs. Den futuro serkano un team di eksperto for di Kòrsou lo bai St. Maarten pa huntu ku un team di St. Maarten baha e FAD’s den laman. 

E donashon aki tin komo meta pa sostené i stimulá e industria di peska lokal di St. Maarten i kompartí konosementu i ta reflehá e koperashon entre e paisnan Karibense di Reino riba tereno di agrikultura i peska. 

Riba potrèt por mira Promé Minister Pisas, representante di Mijnmaatschappij i dos kolaboradó di AVB huntu ku e FAD’s. 

 

Riba potrèt por mira un FAD i tur su asesorio den barku kla pa sali pa St. Maarten.