Di palabra pa akshon: akuerdo ku Minister Boekhoudt a firma na Hulanda a bira realidat

WILLEMSTAD – Loke Minister di GMN, señor Tyron Boekhoudt, a firma resientemente durante su bishita di trabou na Hulanda, awe a tuma forma konkreto. Djaweps 23 di yüli, Fundashon Kuido Ambulansero Kòrsou (FKAK) a lansa su proyekto piloto: “Evaluashon Unifòrm Nobo”. Minister Boekhoudt tabata presente na e lansamentu akí.

E akuerdo ku Minister Boekhoudt a sera na Hulanda ta hasi posibel pa personal di ambulans di FKAK bisti e unifòrm di ambulans, model nobo kual ta wòrdu usa na entre otro Hulanda, Boneiru i Sint Maarten.

Un grupo piloto ku ta konsistí di 10 miembro di personal (sentralista, VP i shofùr) ta bai evaluá durante un luna e unifòrm nobo riba diferente aspekto. Si e proyekto piloto akí resultá den reakshon positivo di e personal di ambulans na momento ku esaki ta ehersiendo su labor, e intenshon ta pa introdusí e unifòrm ofisialmente den transkurso di aña 2027.

Un di e benefisionan klave di e unifòrm akí ta ku e ta duna mihó visibilidat, mehorando asina seguridat pa nos personal na momento ku esaki ta ehersiendo su labor. Ademas, e unifòrm ta duna un aparensia distinto i profeshonal.

Minister Boekhoudt: “Nos personal di ambulans ta para kla di dia i anochi pa kuida i salba bida di nos komunidat. Nan meresé un unifòrm ku ta garantisá nan seguridat i ta reflehá e profeshonalismo ku nan ta demonstrá tur dia. E proyekto piloto akí ta un paso konkreto: di palabra pa akshon.”