Prohibishon di importashon di palu di bakoba i banana for di Venezuela

Willemstad – Ministerio di Salubridat, Medio Ambiente i Naturalesa (GMN) ta alertá
komunidat pa e riesgo serio di e enfermedat di mata Fusarium oxysporum f.sp.
cubense Tropical Race 4 (TR4), konosí tambe komo Panamaziekte, kual por
forma un peliger pa agrikultura, biodiversidat i seguridat alimentisio di Kòrsou.
E efermedat aki ta un hongo òf beskein di tera altamente destruktivo ku ta ataká e
raisnan di palu di banana i ta blòkia e transporte di awa i nutriente kual por resultá
den morto di e planta. Te awor, no tin un tratamientu kímiko òf kura efektivo pa e
enfermedat aki.
Venezuela a konfirmá ofisialmente presensia di TR4 na e estadonan: Aragua,
Carabobo i Cojedes, i a deklará un estado di emergensia fitosanitario na nivel
nashonal. Pa motibu di e distansha geográfiko chikí entre Venezuela i Kòrsou i e
kontakto intensivo di komèrsio i biahe, e riesgo pa introdukshon di e patógeno na
nos isla ta konsiderá komo hopi haltu.
Pa protehá e sektor di agrikultura i e seguridat alimentisio di Kòrsou, ta pidi pa tuma
medidanan fitosanitario di emergensia i pa instituí un prohibishon di importashon
total riba tur palu bibu di bakoba i banana ku ta bini for di Venezuela.
E “importverbod” aki ta un medida preventivo pa evitá ku un enfermedat ku por
kousa daño permanente na e kultivo di bakoba i banana yega na Kòrsou. Un biaha
ku TR4 drenta, eliminashon di e patógeno aki ta sumamente difísil.
GMN ta enfatisá ku protekshon di nos agrikultura, medio ambiente i seguridat
alimentisio ta un responsabilidat di tur nos. Importadónan i hendenan ku ta
transportá material vegetal mester kumpli ku tur regla i rekisito fitosanitario vigente.
GMN ta sigui monitorea e situashon i ta evaluá tur medida nesesario pa prevení
introdukshon i propagashon di e enfermedat aki na Kòrsou.