Prome Minister Mike Eman ta bishita Lima, Peru
Prome Minister Mike Eman ta bishita Lima, Peru, di 26 pa 29 di juli 2026, pa representa Aruba na e instalacion oficial di Keiko Fujimori como presidente di Republica di Peru. Ademas di e ceremonia di traspaso di mando, e programa ta inclui diferente encuentro diplomatico, economico y comercial cu tin como meta di fortalece e relacionnan di Aruba den region. Prome Minister Eman a yega Lima diadomingo 26 di juli laat den anochi hunto cu secretario general di Ministerio di asunto general Robert Candelaria, director interno di Departamento di relacionan exterior (DBB) esta Juri Nicolas, Hefe di Prensa di Gabinete AVP-Futuro Marko Espinoza. Roberto Rafael Max Rodriguez Arnillas, Director general pa America di Ministerio Relacionnan Exterior di Peru a ricibi e delegacion na Aeropuerto Internacional Jorge Chavez den e ciudad capital. Riba dialuna 27 di juli, e lo cuminsa su programa oficial cu un reunion informativo cu embahador di Reino Hulandes Alexander Kofman, sigui pa un mesa rondo cu representantenan di organisacion cu tin e tema di sostenibilidad halto riba nan agenda. Mas laat e dia ey, Prome Minister Eman lo tin un encuentro cu Gabriel Amaro, presidente di Asociacion de Gremios Productores Agrarios del Peru (AGAP). E combersacion lo concentra riba posibilidadnan pa exportacion di productonan agricola peruano pa Aruba. Durante un lunch ofreci pa embahador Alexander Kofman, Prome Minister Eman lo reuni tambe cu Michael Guevara, presidente di PromPeru, y Rafael del Campo, vicepresidente di Asociacion de Exportadores (ADEX). E encuentronan aki ta importante den cuadro di e esfuerso pa amplia e lasonan comercial, stimula intercambio economico y explora oportunidadnan nobo entre Aruba y Peru.
Un momento importante den e programa di dialuna ta e encuentro bilateral entre Prome Minister Eman y presidente electo Keiko Fujimori na Palacio Torre Tagle. Despues di esaki, Prome Minister Eman lo participa na un cena oficial ofreci pa e presidente saliente di Peru, Jose Maria Balcazar, na honor di e hefenan di Estado y Gobierno presente pa e traspaso di mando. Diamars 28 di juli, Prome Minister Eman lo reuni bilateralmente cu presidente di Paraguay, Santiago Pena. Den e programa tin espacio reserva tambe pa posible encuentro cu otro mandatario di region. E ceremonia solemne di huramentacion di Keiko Fujimori lo tuma luga den Congreso di Republica. Despues di huramentacion, Fujimori lo dirigi su mensahe na nacion Peruano. Prome Minister Eman lo asisti na ambos momento, hunto cu embahador di Reino Hulandes Alexander Kofman. Mas laat, presidente Fujimori lo ricibi e hefenan di Estado y Gobierno na Palacio di Gobierno. Prome Minister Eman tambe lo participa na e almuerzo oficial ofreci pa e presidenta nobo na honor di e dignatarionan internacional.
E bishita di Prome Minister Eman lo finalisa diaranson 29 di juli. Prome cu su regreso pa Aruba, e lo duna entrevista na diffrente medionan di comunicacion Peruano y reuni cu Jonas Geeraerts, secretario di Camara di Comercio Peruano-Hulandes NLAndes. Participacion di Aruba na e instalacion presidencial ta subraya e importancia di Peru como socio den region. E bishita ta crea oportunidad pa fortalece e lasonan diplomatico y duna un impulso nobo na cooperacion den tereno di comercio, agricultura, turismo y sostenibilidad.
Aruba y Peru ta explora cooperacion den sostenibilidad. Prome Minister Mike Eman a participa na un mesa rondo cu representantenan di diferente organisacion y compania peruano cu tin sostenibilidad halto riba nan agenda. E encuentro a tuma luga na residencia di Reino Hulandes na San Isidro, Lima, hunto cu embahador Alexander Kofman. Entre e participantenan tabatin Albina Ruiz, ex minister di medio ambiente di Peru y fundadora di Ciudad Saludable, y Pedro Gamio, ex viceminister di energia, profesor na universidad y consultant den sector di energia renovabel. E grupo di empresario y experto Peruano comprometi cu desaroyo sostenibel a forma parti di un combersacion ameno. Durante e mesa rondo, e participantenan a explora posibilidadnan pa Aruba y Peru uni esfuerso den e temanan esencial manera maneho di awa, energia renovabel, cuido di naturalesa, economia circular, cambio climatico, turismo sostenibel y maneho di desperdicio.
Prome Minister Mike Eman a reuni cu Gabriel Amaro Zamora, presidente di Asociacion di Gremionan di Productornan Agricola di Peru, AGAP, pa explora posibilidadnan pa amplia comercio di berdura y fruta fresco entre Aruba y Peru. E reunion a tuma luga na residencia di embahador di Reino Hulandes na Lima y a concentra riba e posibilidad pa suministra mas ainda e mercado di Aruba directamente cu producto di agricultura fresco for di Peru.
AGAP ta representa e productornan, e procesadornan, e comerciantenan, e exportadornan y ge remionan principal di sector agricultuor Peruano. E organisacion ta promove produccion y exportacion di agricultura y ta contribui na posiciona Peru como un pais cu ta exporta producto di calidad riba mercado internacional.
Segun Gabriel Amaro, e encuentro cu Prome Minister Eman tabata importante pa conoce miho e mercado Arubano y identifica e necesidadnan cu tin riba nos isla. “E reunion tabata hopi importante pa conoce mas di e mercado di Aruba y e posibilidad pa atende e mercado directamente for di Peru cu nos productonan agricola”, Amaro a declara.
Durante e combersacion a identifica demanda pa e productonan manera blueberry (bosbes), druif y diferente otro fruta y berdura. Amaro a indica cu, ademas di e poblacion local, Aruba tin un sector hotelero importante cu ta genera demanda continuo pa alimento fresco y di calidad. “Aruba tin necesidad di productonan en general. Nan tin un cadena importante di hotel, ademas di e poblacion, cu ta rekeri acceso na alimento di calidad”, e presidente di AGAP a bisa.
Oportunidad pa amplia comercio
Amaro a confirma cu tin posibilidad real pa expande comercio di producto fresco entre ambos pais. Sinembargo, pa logra esaki ta necesario analisa e demanda, e temporada di cada producto y e cantidad cu mercado Arubano ta rekeri. “Nos tin como meta pa amplia nos mercadonan internacional y Aruba ta un mercado interesante. Nos mester wak e demanda, e lunanan y e tipo di producto cu nan ta rekeri, pa determina con nos por suministra nan for di Peru”, Amaro a splica. Comercio internacional ta beneficia di tecnologia nobo y di apertura di ruta nobo, pero ta sigui enfrenta e retonan logistico y comercial. Segun Amaro, e obstaculonan aki por wordo supera si tin informacion cla riba necesidad, e volumen y capacidad rekeri durante cada temporada. E encuentro ta habri caminda pa un evaluacion mas profundo di conectividad, transporte, cantidad di carga y e condicionnan pa importa producto fresco na Aruba.
Peru como potencia agricultor
Amaro a destaca cu Peru ta un di e paisnan lider mundial den exportacion di producto fresco manera fruta y berdura. Segun e presidente di AGAP, Peru ta lider mundial den exportacion di producto fresco y ta ocupa e segundo posicion den exportacion di avocado y ta entre e exportadornan principal di mango y asperges (esparrago) fresco y congela. Actualmente, sector agricultor peruano ta suministra mas di 150 pais rond mundo. E posicion fuerte di Peru como exportado y e cercania geografico cu Aruba por crea oportunidad pa diversifica e suministro di producto fresco na nos isla. Na mes momento, esaki por genera lazonan comercial nobo y contribui na un cadena di suministro mas directo entre ambos pais. E reunion entre Prome Minister Eman y Gabriel Amaro ta representa un prome paso pa conecta e necesidadnan di mercado Arubano cu e capacidad di produccion y exportacion di sector agricultur Peruano.
Prome Minister Mike Eman a reuni cu Michael Guevara Varela, presidente ehecutivo di PromPeru, y Rafael del Campo Quintana, vicepresidente di Asociacion di Exportadornan di Peru, ADEX. E encuentro a tuma luga durante un almuerzo di trabou ofreci pa embahador di Reino Hulandes, Alexander Kofman, na Lima. E combersacion a concentra riba oportunidadnan pa fortalece turismo, comercio y exportacion entre Aruba y Peru.
Michael Guevara a destaca cu intercambio turistico entre ambos pais a bin creciendo gradualmente. Segun e presidente ehecutivo di PromPeru, Aruba su reputacion como un destino sigur y e puntonan cu ambos pais tin en comun ta crea un bon base pa sigui desaroya e relacion. “Aruba ta un pais sigur y tin hopi punto en comun cu Peru. For di PromPeru nos lo wak e sinergia cu tin, pa mas ciudadano di Aruba por bishita Peru y mas Peruano tambe por conoce e bunita pais di Caribe aki”, Guevara a declara.
E presidente di PromPeru a indica cu ambos destino tin un oferta turistico basa riba naturalesa y cultura. Mientras Aruba ta conoci pa su playanan, clima y siguridad, Peru tin diferente region geografico, sitio turistico y un herencia cultural amplio. Guevara a agrega cu Peru por studia e manera cu Aruba a fortalece seguridad pa su bishitantenan. Segun dje, esaki ta un area den cual tin espacio pa intercambio di experiencia y cooperacion. “Nos mester wak con Aruba a fortalece su seguridad pa turista. Mi ta kere cu tin un trabou grandi cu nos por realisa for di Peru”, e presidente ehecutivo di PromPeru a bisa.
Rafael del Campo a indica cu exportadornan peruano semper ta buscando oportunidad nobo y cu Caribe ta representa un mercado interesante cu ainda tin espacio pa crecemento. “Caribe ta un oportunidad adicional pa tur Peruano. Ta un mercado importante, cu un turismo impresionante”, e vicepresidente di ADEX a declara. Segun Del Campo, e potencial no ta limita na e mercado local di Aruba. E diversidad di turista cu ta bishita e isla ta crea un oportunidad pa producto peruano wordo presenta na consumidor for di diferente pais den un solo destino. Del Campo ta mira potencial special pa exportacion di producto agricola. Prome cu avansa, sinembargo, ta importante pa studia composicion di mercado, demanda y preferencia di e diferente tipo di bishitante cu Aruba ta ricibi. “Ta un mercado hopi diverso, pasobra tin turista for di diferente pais. Aruba ta un punto crucial pa studia con nos por yega na consumidor di diferente parti di mundo den un solo luga”, Del Campo a bisa
639114718427035"
639114718427035"