E encuentro lo reuni representantenan di Aruba, Corsou, Sint Maarten y Hulanda, incluyendo participantenan for di Bonaire, Saba y Sint Eustatius como parti di delegacion Hulandes, pa sigui fortalece cooperacion y intercambio di conocemento den e area di salud publico y cuido.

E Vierlandenoverleg ta brinda e cuater paisnan un oportunidad importante pa comparti experiencia, delibera tocante prioridadnan comun y sigui fortalece colaboracion den Reino.

Durante e siman, e delegacionnan lo participa den diferente reunion y sesion, cu enfoke riba cooperacion, intercambio di conocemento y dialogo tocante retonan comparti den salud y cuido.

Riba diahuebs 19 di november, e ministernan di e cuater paisnan lo reuni na Aruba pa e parti ministerial di e Vierlandenoverleg. Durante e dia lo tin reunionnan bilateral y deliberacionnan entre e ministernan tocante cooperacion y prioridadnan comparti.

Como parti di e programa, lo presenta tambe e campaña regional “NOTHING NADA NIX18”, un iniciativa desaroya den cooperacion entre e seis islanan di Caribe Hulandes y Hulanda, cu ta promove e mensahe di no consumi alcohol bou di edad di 18 aña. E campaña tin como meta pa conscientisa comunidad tocante e efectonan negativo di alcohol riba salud y desaroyo di hobennan y pa promove un generacion mas saludabel.

Como anfitrion, Ministerio di Salubridad ta considera e encuentro un oportunidad importante pa sigui fortalece relacionnan di cooperacion entre e paisnan y pa promove intercambio di conocemento y experiencia den salubridad publico y cuido.

Cu organisacion di e Vierlandenoverleg 2026, Ministerio ta reafirma su compromiso cu cooperacion y cu un enfoke comparti pa enfrenta retonan den salud y cuido.

E encuentro ta cuadra cu e vision di Ministerio pa contribui na un sociedad saludabel, resiliente y inclusivo, den cual cada ciudadano tin un existencia digno.