MDC i Ministerio di Salú, Medio Ambiente i Naturalesa ta eksplorá kolaborashon riba kalor i mortalidat.

Willemstad, 4 di ougùstùs 2026

Servisio Meteorológiko Kòrsou (MDC) a risibí un delegashon di Ministerio di Salú, Medio Ambiente i Naturalesa (GMN) dia 4 di ougùstùs 2026. Meta di e bishita di trabou tabata pa konhuntamente prepará un investigashon tokante e influensia di kalor riba mortalidat na Kòrsou. A akordá riba e punto di akshon aki durante e último reunion di Plataforma di Klima na final di aña pasá.

Departamento di Klimatologia di MDC a presentá su promé rapòrt di evaluashon tokante e konsekuensianan di kambio klimátiko pa Kòrsou. Durante e presentashon, nan a trata diferente senario di klima i riesgo, ku atenshon spesial pa e mapanan di kalor. E mapanan akí ta duna un mihó bista di kua gruponan di poblashon i kua áreanan ta mas vulnerabel pa kalor. Pa esaki, a hasi uso tambe di informashon di senso di Sentro di Statistik Kòrsou (CBS).

For di GMN, den kolaborashon ku NASKHO, i komo parti di e programa di estudio di Medisina Sosial pa studiantenan di medisina di Universitair Medisch Centrum Groningen (UMCG), tin un investigashon andando tokante e konsekuensianan di kalor pa salú públiko na Kòrsou. Meta di e investigashon akí ta pa optené konosementu sientífiko tokante e relashon entre di kalor i mortalidat, i a base di esei desaroyá medidanan adekuá di maneho i prevenshon.

Despues lo presentá e resultadonan di e investigashon na ámbos ministerio i durante di e seshon anual di Plataforma di Klima.

Di e manera aki, ta duna un aporte importante na implementashon di e akshonnan klimátiko di Plataforma di Klima, dor di pone na mapa e konsekuensianan di kalor pa salú di poblashon di Kòrsou i dor di kontribuí na desaroyo di un maneho efektivo pa kalor.

Riba e potrèt:

· sr. Javier Diaz, konsehero spesialista di naturalesa

· sra. Lisanne Kiestra, funshonario di maneho di GMN

· sr. Apostolos Papandroudis, ko-asistente di medisina di UMCG

· dr. Albert Martis, direktor di MDC

· sr. Joffrey Boekhoudt, hefe di Divishon di Klimatologia

· sr. Jonathan Zoetrum, investigadó di Divishon di Klimatologia