HUB Cámara Santo Domingo, conoci como “The Business Hub of the Region”, ta un di e plataformanan comercial mas importante den e region, caminda cumpradonan internacional, productornan, exportadornan, distribuidornan y empresanan ta bini hunto pa crea contacto directo, explora oportunidadnan di negoshi y establece relacionnan comercial nobo.

Pa Minister di Finansa, Asunto Economico y Sector Primario Geoffrey Wever, participacion di empresanan Arubano den eventonan manera HUB Cámara Santo Domingo ta cuadra directamente cu e maneho pa fortalece e posicion economico di Aruba y amplia su conexionnan comercial den e region.

“Como un economia chikito y habri, Aruba mester sigui mira pafor, crea aliansanan nobo y facilita oportunidadnan concreto pa nos empresanan. Nos no por depende solamente di e mesun mercadonan y e mesun cadenanan di suministro. Nos mester busca alternativanan activamente, crea lasonan y relacionnan comercial cu por fortalece nos economia,” Minister Wever a declara.

Republica Dominicana ta un mercado regional cu ta ofrece oportunidadnan importante pa Aruba, especialmente pa empresanan cu ta buscando proveedornan nobo, productonan competitivo, miho prijsnan, colaboracionnan comercial y oportunidadnan pa amplia nan red comercial.

E evento ta enfoca riba diferente sector , entre otro agro, agro-industria, industria, construccion, tecnologia y energia. E sectornan aki ta relevante pa Aruba den e esfuerso continuo pa fortalece cadenanan di suministro, identifica productonan competitivo y crea mas opcionnan pa sector priva.

Durante HUB Cámara Santo Domingo 2026, participantenan Arubano lo por reuni directamente cu empresanan Dominicano, compara productonan y prijsnan, identifica posibel proveedornan y explora acuerdonan comercial mediante reunionnan B2B (business-to-business) structura.

Un aspecto importante di e evento ta e programa pa cumpradonan internacional. Participantenan selecciona lo por beneficia di estadia di tres dia y dos anochi na hotel, transportacion entre aeropuerto y hotel, un agenda personalisa cu empresanan local cu a wordo pre-cualifica, reunionnan B2B, acceso na conferencia, exhibicion comercial, actividadnan di networking y apoyo di ProDominicana durante y despues di e evento.

Segun Minister Wever, e papel di Gobierno ta pa crea e condicionnan y habri portanan pa sector priva por crece.

“Gobierno no ta haci negoshi pa e empresario. Nos responsabilidad ta pa crea e conexionnan, facilita acceso y habri caminda pa empresarionan Arubano por identifica oportunidadnan y haci e siguiente paso. Si nos por conecta nos empresanan directamente cu productornan, exportadornan y proveedornan den region, nos ta creando mas posibilidadnan pa competencia, inversion y crecemento economico na Aruba,” Minister Wever a enfatisa.

Departamento di Asunto Economico, Comercio y Industria (DAECI), mediante Exprodesk, lo facilita e participacion di empresanan Arubano interesa. Exprodesk ta brinda informacion, guia y coordinacion cu e organisadornan, unda ta necesario, den cuadro di su tarea pa promove comercio, acceso na mercado y conexionnan internacional pa empresarionan Arubano.

Como parti di preparacion pa HUB Cámara Santo Domingo 2026, Minister Wever y ADECI ta invita tur empresario , importador , distribuidor  y nan representantenan comercial interesa pa asisti na un anochi informativo diaranson 12 di augustus 2026, di 6:00 PM pa 7:00 PM na Cas Veneranda.

“Nos kier mira mas empresarionan Arubano crusando frontera, creando contacto y descubriendo mercado nobo. Cada conexion comercial nobo por representa un oportunidad pa un empresa por crece, pa crea mas actividad economico y finalmente fortalece Aruba. E oportunidad t’ey, awo ta e momento pa nos sector priva haci uso di dje.”

HUB Cámara Santo Domingo 2026 lo tuma luga dia 9 y 10 di september 2026 na Santo Domingo y ta  organisa door di Cámara de Comercio y Producción de Santo Domingo y ProDominicana.

Empresanan interesa ta invita pa tuma contacto cu Exprodesk, cu Sr. Giacomo Pais, via e-mail: g.pais@deaci.aw , pa ricibi mas informacion y RSVP pa e sesion di 12 di augustus.