KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Konferensia Inisial di DOS pa Aña Eskolar Nobo

Enseñansa, Siensia, Kultura & Deport

Konferensia Inisial di DOS pa Aña Eskolar Nobo

Publiká riba 17 Ougùstùs 2026

DOS ta kuminsá aña eskolar ku konferensia Inisial inspirativo den Otrobanda

WILLEMSTAD – Servisio pa Skolnan Públiko (DOS) a kuminsá e aña eskolar 2026/2027 na un manera inspirativo ku e Konferensia Inisial DOS DEN BALANSA 2026. Bou di e tema “Mi ta Outéntiko”, 900 profeshonal den enseñansa a reuní pa un dia dediká kompletamente na desaroyo personal, konekshon i inspirashon.

Siguiendo e éksito di aña pasá, DOS a skohe Otrobanda konsientemente komo e área pa e konferensia inisial di e aña aki. E bario distintivo a proveé e área perfekto pa un dia kaminda partisipantenan a keda invitá pa eksplorá kamindanan nobo, tantu literalmente komo figurativamente. Nan a konsiderá Otrobanda komo ehèmpel di kon bo por sigui desaroyá i re-definí bo mes trahando huntu i sin ku bo mester tuma distansia di loke ta hasi bo úniko.

E konferensia a keda habrí ofisialmente na e skol Johan Maurits, den presensia di Minister di Enseñansa, Siensia, Kultura, i Deporte, Hefe di Servisio di DOS, dirigentenan di skol i huntu ku demas profeshonal den Enseñansa ku ta laborá pa DOS. E seremonia di apertura a enfatisá e importansia di invertí den e persona tras di enseñansa.
E tema ‘Mi ta Outéntiko’ ta representá un profundisashon di e lema ‘DOS DEN BALANSA – E hende i e kontenido’. E aña aki e enfoke tabata riba e profeshonal den enseñansa komo individuo. A base di e konvikshon ku enseñansa outéntiko, ku ta duna espasio pa desaroyo di talento ta kuminsá ku e hende ku sa ken e ta, kiko e ta para p’e i unda e ke ta. DOS a reta su personal pa reflehá riba nan propio identidat, talentonan, motivashonnan i kresementu personal pa asina nan por duna espasio pa e mucha i hóben den skol hasi meskos.

Durante e mainta, partisipantenan a partisipá na un di nuebe “Teacher Experiences.” Na 27 lokalidat den Otrobanda, nan a partisipá den diferente tayer, tareanan práktiko i un kaminata pa reflehá. Kada eksperensia a proveé un oportunidat pa konekshon, reflekshon, desaroyo personal i e interkambio di eksperensia ku koleganan. Den oranan di atardi, e partisipantenan a reuní na un di e tres skolnan anfitrion esta, Johan Maurits School, SGO Dr. W.J. Goslinga School i SGO Jacques Ferrandi School pa kolaborá riba e tarea di diseñá interaktivamente: “E klas di 2036.” Durante e seshon aki, nan a desaroyá un vishon kompartí pa e klas ideal di futuro pa Kòrsou, tradusiendo e bista di e mainta den ideanan konkreto pa e enseñansa di mañan.

Ku e Konferensia Inisial 2026, DOS ta re-afirmá ku invertí den enseñansa ta kuminsá ku invertí den e hende ku ta hasi e diferensia den klas tur dia. Un maestro ku konosé su mes i ta duna espasio na otro pa desaroyá den su outentisidat, ta mihó ekipá pa inspirá alumno i studiantenan i duna guia optimal den nan desaroyo.

Nihayra Leona, Direktor di DOS:
“‘Mi ta Outéntiko’ ta mas ku djis un tema. Ta un invitashon na kada profeshonal den enseñansa pa hasi un diferensia usando nan mes forsa. Ora un maestro por ta outéntiko, e ta krea espasio pa alumno i studiantenan ta nan mes tambe. Esei ta e fundeshi di enseñansa fuerte.”
Ku e komienso inspirativo aki, DOS ta wak padilanti ku konfiansa pa un aña eskolar nobo den kua konekshon, kresementu personal i edukashon di kalidat haltu ta bai man den man.

 

 

639114718427035"
639114718427035"