26 augustus; dia Internacional di cacho Un mascota ta un compromiso pa bida
26 augustus; dia Internacional di cacho Un mascota ta un compromiso pa bida
ORANJESTAD-26 augustus 2026- Adopta of cumpra un mascota ta un decision cu
ta trece alegria, pero tambe un responsabilidad cu ta dura durante henter bida di e
animal. Un cacho no ta un regalo temporal ni algo cu por wordo laga atras ora
circunstancianan cambia.
E ley di cacho, Hondenverordening ta usa e palabra ‘houder’. Esaki no ta referi
solamente na e propietario oficial, sino tambe na e persona cu tin e cacho bou di su
cuido. For di e momento cu bo acepta cuida un cacho, bo ta carga responsabilidad
pa su bienestar y comportacion.
Prome cu tuma un mascota, cada persona mester evalua si e tin suficiente tempo,
espacio y recurso pa cuminda, cuido veterinario, higiena, supervision y atencion.
Tambe mester pensa riba kico lo pasa durante biahe, mudamento, enfermedad of
cambio den situacion financiero.
Hopi animal ta termina riba caya pasobra nan a wordo tuma sin considera e
compromiso completo. Preveni abandono ta cuminsa cu un decision consciente. Si
bo no ta prepara pa e responsabilidad, e decision mas responsabel ta pa warda.
Gobierno, a traves di e Centro di Control di Cacho y den futuro e Centro di Rescate
y Control di Animal, y tambe hopi fundacion na Aruba ta yuda animalnan den
necesidad, pero esaki no por reemplasa responsabilidad di un doño mes. Cada
mascota cu keda protegi y cuida ta un animal menos cu lo por termina riba caya.
Base legal: Hondenverordening, articulo 1, definicion di ‘houder’.
Sea bo tambe un doño di mascota responsabel. Cada acto di responsabilidad ta
salba un bida. Planta amor, proteha nan bienestar y hunto nos por logra un Aruba
sin animalnan bandona.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba,
follow nos riba Instagram directie_volksgezondheid_aruba, sigui nos den WhatsApp
Channel, ricibi tur informacion den Aruba Health App, bishita http://www.dvg.aw, yama
5224200 of manda email na servicio@dvg.aw
