Temporada nobo di e podcast gubernamental ‘Ki Bo Ke Men?’ ta bai kuminsá

WILLEMSTAD – Djadumingu, 30 di ougùstùs 2026, e di ocho temporada di ‘Ki Bo Ke Men?’ ta kuminsá. E podcast ofisial di Gobièrnu di Kòrsou. Kolega ámtenar i presentadó Christopher de Wind ta bolbe bai den kòmbersashon ku ámtenarnan i ekspertonan tokante tópikonan aktual, maneho i proyektonan di Gobièrnu.

For di su lansamentu na 2023, ‘Ki Bo Ke Men?’ ta ofresé konteksto i splikashon kla riba tópikonan ku ta biba den komunidat. E kòmbersashonnan ta informativo, krítiko ora ta nesesario i semper respetuoso. Asina, komunidat por komprondé mihó kon ta tuma desishonnan i kiko esakinan ta nifiká pa Kòrsou.

Ku temporada 8, Gobièrnu ta sigui enfoká riba komunikashon kla, aksesibel i transparente. Tur djadumingu pa 7:30’or di anochi lo publiká un episodio nobo via e kanalnan ofisial di Gobièrnu di Kòrsou. Tambe por sintonisá TV Direct pa 6:30’or di anochi i TeleCuraçao pa 7:30’or di anochi.

Por wak e episiodionan nobo i anterior tambe via di e kanal ofisial di Gobièrnu Gob. riba kanal 84 di FLOW i sigui Gobièrnu di Kòrsou via Facebook, Instagram, YouTube i e kanal ofisial di WhatsApp.

Siudadanonan ta keda kordialmente invitá pa kontribuí ku sugerensia pa tópikonan ku nan lo ke sa mas di dje den e ‘podcast’. Por entregá sugerensia òf petishon via e siguiente link:
https://gobiernu.co/ideaKiBoKeMen.

‘Ki Bo Ke Men?’ ta un produkshon di Direktorado di Komunikashon i Informashon.