Cu inicio di aña escolar nobo DVG ta inicia Campaña Anual di Vacunacion Escolar
Cu inicio di aña escolar nobo DVG ta inicia Campaña Anual di Vacunacion Escolar
ORANJESTAD, Aruba 26-08-2027: Cu inicio di aña escolar 2026-2027, seccion Jeugdgezondheidszorg (JGZ) di Directie Volksgezondheid (DVG) ta inicia su Campaña Anual di Vacunacion Escolar.
Entre 14 september y 9 oktober e dokter- y nursenan di scol trahando na JGZ lo bishita tur scol preparatorio y basico na Aruba pa vacuna muchanan cu segun nan edad of klas ta na turno pa vacunacion segun e skema di vacunacion nacional.
E vacunanan cu lo wordo administra durante e campaña ta:
- DKTP, contra difteria, kinkhoest, tetano y polio;
- MMR, contra sarampi, cacheton y rubella;
- HepB, contra hepatitis B;
- HPV, contra virus papiloma humano
E aña aki ta marca un cambio importante den e campaña di vacunacion escolar. Pa prome biaha lo ofrece e vacuna di HPV na mucha homber den zesde klas despues cu na 2014 a cuminsa ofrece e vacuna aki na mucha muhe. HPV ta un virus hopi comun cu por infecta tanto muhe como homber. A keda demonstra cu banda di cancer na boca di matriz un infeccion cu HPV por causa diferente otro forma di cancer, tanto cerca hende muhe como cerca hende homber. Aki ta trata principalmente di cancer di anus, boca y garganta.
Mayor of representante legal di muchanan cu ta bin na remarke pa vacunacion lo ricibi un foyeto cu informacion y un formulario di permiso via scol. Ta importante pa firma e formulario y entreg’e bek na scol mas pronto posibel. Sin permiso di mayor of representante legal, JGZ no lo vacuna e mucha.
Pa muchanan cu a nace of ricibi vacunanan anterior pafo di Aruba, JGZ ta solicita nan carchi of prueba di vacunacion. Por manda un copia of potret di esaki via email. A base di e informacion aki, JGZ lo controla si e mucha ta completamente vacuna segun su edad y e skema di vacunacion vigente na Aruba.
DVG ta pidi tur mayor pa coopera cu e campaña. Un cobertura di vacunacion halto ta proteha no solamente cada mucha, sino tambe nos scolnan, famianan y comunidad completo.
Vacunacion ta prevencion, proteccion y un inversion den futuro salud di nos muchanan.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 522-4200 of manda email na jgz@dvg.aw of servicio@dvg.aw
