Reclassering ta start kampaña: “Di bishita serka nos”

Willemstad – Reclassering den su intento pa fortalesé e lasonan di trabou ku su partnernan, a start e kampaña “Di bishita serka nos” den kual ta invitá e diferente partnernan di trabou di bishita, pa asina por elaborá tokante di e trabou di Reclassering, kompartí ideanan i yega na akuerdonan konkreto pa fortalesé e lasonan di trabou den práktika.

Reclassering ta forma parti di e kadena hudisial i ta enkargá ku e tarea importante den e proseso di resosialisashon di personanan ku haña nan den kontakto ku hustisia. Pa por ehersé e tarea aki di forma efektivo un bon kolaborashon di trabou ku diferente partner ta esensial, tantu esnan den e kadena hudisial komo otro partnernan den nos komunidat.

Den kuadro di e kampaña menshoná Kuerpo Polisial Kòrsou (KPC) ku enfoke riba e tim di polisnan di bario, a haña invitashon i tabata di bishita na Reclassering kaminda di un forma hopi interaktivo a interkambiá tokante e ròl di Reclassering den e proseso di resosialisashon.

E mainta aki tabata unu eksitoso i a marka ku esaki un bon paso pa fortalesé e lasonan di trabou ku tur partnernan ku ta aportá den resosialisashon i kombatimentu di kriminalidat.

Esaki ta djis e komienso. Mas di e seshonnan aki lo sigui den e periodo benidero ku diferente partnernan. E meta ta kla: traha huntu di forma efektivo pa kontribuí na un komunidat mas sigur.