E proyecto ta forma parti di e esfuersonan pa conserva y revitalisa e facilidadnan publico cu tin tanto balor pa comunidad local.

Facility Center na Rodgers Beach tin un balor sentimental y ta trece hopi recuerdo bunita pa diferente generacion Rubiano, particularmente pa comunidad di San Nicolas. Sinembargo, mientras tempo ta pasa e edificio a deteriora y tabatin necesidad di renobacion y mantencion.

Awo cu e trabounan finalisa, e facilidad a haya un imagen completamente refresca y ta cla pa comunidad local bolbe haci uzo y disfruta di dje. Como parti di e proyecto, tanto e pier como e deck na Rodgers Beach tambe a ricibi e mantencion necesario, contribuyendo na un ambiente mas agradabel y sigur pa tur usuario.

Minister di Turismo, Transporte y Labor, Wendrick Cicilia ta gradici A.T.A. p’e bon colaboracion y compromiso pa sigui realisa proyectonan cu tin un impacto directo riba comunidad. Tambe e la aplaudi tur e personanan y instancianan envolvi cu, danki na nan trabou y dedicacion, a haci e renobacion aki un realidad.