Cu e acuerdo aki Gobierno ta crea un structura mas fuerte, transparente y eficiente pa proteccion di consumidor y pa un funcionamento mas ordena di mercado Arubano.

E firmamento di e protocol ta un siguiente paso concreto den implementacion di e Landsverordening bestuursrechtelijke handhaving consumentenbescherming, cu a drenta parcialmente na vigor dia 15 di maart 2026. E ley ta duna AFTA responsabilidad pa supervision di cumplimento di normanan legal den cuadro di proteccion colectivo di consumidor, mientras cu Departamento di Asunto Economico, Comercio y Industria ( DAECI) ta encarga cu tratamento di kehonan individual, registracion di e kehonan y brinda informacion, conseho huridico y mediacion caminda ta necesario.

Cu e protocol nobo, ambos instancia ta establece acuerdonan claro riba intercambio di informacion, coordinacion di maneho y supervision, alineacion di procesonan y proteccion di informacion confidencial. Esaki ta crea un cadena di proteccion mas completo: for di e consumidor individual cu presenta un keho, te na supervision mas amplio ora tin indicacion cu un problema ta afecta un grupo di consumidornan.

“Un economia fuerte no ta solamente un economia cu ta crece. Mester tin confiansa, reglanan cla y institucionnan cu ta funciona. Consumidor mester conoce su derechonan, mester tin acceso na informacion corecto y mester sa unda acudi ora algo no ta bay manera mester ta. Cu e acuerdo aki nos ta pone e responsabilidadnan cla y ta conecta e instancianan cu mester tuma accion. Esaki ta bon gobernacion y esaki ta manera nos ta fortalece economia,” di Finansa, Asunto Economico y Sector Primario, Geoffrey Wever a indica.

Un elemento importante den e cooperacion ta e Consuloket, e loket digital pa consumidor. AFTA ta responsabel pa financiamento, contenido, maneho y mantencion di e loket, mientras cu DAECI ta encarga cu e sistema pa registra y procesa e notificacionnan di consumidor cu drenta via Consuloket. Lo  alinea e sistemanan pa ambos instancia por dispone di informacion relevante pa cumpli cu nan responsabilidadnan di forma eficiente.

E protocol ta establece tambe un forma structural di supervision riba e cooperacion mes. Directornan di AFTA y DAECI lo reuni por lo menos cuatro biaha pa aña pa evalua ehecucion, progreso y eventual obstaculonan. Na nivel operacional, funcionarionan lo mantene contacto cu e frecuencia necesario. Ademas, lo evalua e acuerdo y su ehecucion por lo menos un biaha pa aña pa determina si adaptacion ta necesario pa sigui mehora tratamento di kehonan y proteccion di consumidor.