Como minister di Finansa, Asunto Economico y Sector Primario, minister Geoffrey Wever a duna inicio na e transicion den Gobierno. Diferente departamento y compania estatal bou di su ministerio ya ta haciendo uzo di vehiculo electrico, entre otro Directie Economische Zaken, Handel en Industrie (DEZHI), Servicio na Defensa di Consumidor (SEDECO), Centraal Bureau voor de Statistiek (CBS), Dienst Telecommunicatie Zaken (DTZ) y Post Aruba N.V. y awo tambe pa Conseho di Minister di Aruba.

E paso aki no ta un iniciativa aisla. E ta forma parti di un proceso mas amplio pa modernisa operacion di Gobierno, reduci gasto, haci uzo mas eficiente di energia y prepara Aruba pa un futuro unda sostenibilidad y independencia energetico ta ocupa un posicion cada biaha mas importante.

Gobierno su rol ta esencial den e proceso di transicion aki no solamente door di traha maneho, pero tambe door di ehecuta esaki. Electrificacion gradual di e fleta publico ta un ehempel concreto di con Gobierno mes ta implementa e cambio cu e kier stimula den comunidad. Cu esaki gobierno ta demostra su compromiso pa lidera e transicion aki. Den e cuadro aki ta cumpli tambe cu palabracionnan haci den nan Programa di Gobernacion unda cu a keda acorda cu auto di trabou pa minsternan no mag di ta mas caro cu EVs y/of hybrid na balor di Afl. 70.000.

E proceso a conoce diferente fase. Despues di un consulta di mercado y un destaho publico, a selecciona e compania Green Wheels pa entrega e vehiculonan electrico pa e ministernan, cu excepcion di Prome Minister Eman.

E resultadonan inicial ta mustra cu e cambio no solamente tin un beneficio ambiental, pero tambe financiero. Segun dato practico di e fleta di CBS durante e prome seis lunanan, gasto di combustibel a baha cu aproximadamente 70%, di un promedio di AWG 1.500 pa AWG 405 pa luna pa cada vehiculo.

Pa Aruba, e transicion aki tin un importancia strategico. Como isla, nos pais ta altamente dependiente di combustibel fosil importa y, consecuentemente, ta vulnerabel pa fluctuacion di prijs y desaroyo internacional fuera di nos control. Cada paso pa reduci e dependencia aki ta contribui na mas stabilidad, mas eficiencia y un economia cu ta mihor prepara pa futuro.

“Transicion pa sostenibilidad mester wordo converti den accion concreto. Como Gobierno, nos kier duna e ehempel y implementa e cambionan cu nos mes ta considera necesario pa futuro di Aruba. Electrificacion di nos fleta ta yuda baha gasto, reduci dependencia di combustibel fosil y crea espacio pa haci mas uzo di energia sostenibel produci localmente. Esaki ta un transicion cu nos ta dirigi paso pa paso y cu mester genera beneficio duradero pa nos pais,” Minister Wever a remarca.

Ta fortalece e direccion aki tambe mediante e GO Programme, un programa financia pa Union Europeo pa acelera transicion di energia den islanan. Den e programa aki Aruba ta ehecuta e proyecto “Reducing Transport-Related Carbon Emissions and Fuel Costs from the Car Fleet of the Government of Aruba.”

E proyecto, implementa pa e empresa di asesoria Aleman Energynautics, cu maneho di proyecto di Expertise France, ta sostene Aruba den preparacion di un plan pa electrificacion completo di e fleta di Gobierno. Esaki ta inclui un maneho di compra pa vehiculonan electrico, un plan pa maneho di baterianan, desaroyo di infrastructura di carga, analisis di impacto riba e red electrico y instrumentonan di maneho pa facilita un adopcion mas amplio. Ta haci e trabou den colaboracion cu partnernan local, incluyendo ELMAR y DOW.

E transicion ta construi riba pasonan cu a inicia anteriormente y cu gobierno ta continua, amplia y acelera. Asina ta sigura continuidad den un proceso strategico cu mester fortalece Aruba riba termino largo.