Imigrashon na airopuerto ta logra un paso mas den duna  servisio mas profeshonal

Biaheronan ku yega Kòrsou ta gosa di mihó aparensia di balinan di Imigrashon

 

WILLEMSTAD, 1 di sèptèmber 2026 –  Ministerio di Hustisia, bou di liderazgo di Minister Shalten Hato, ta sigui tuma pasonan konkreto pa profeshonalisá i modernisá e proseso di Imigrashon na Airopuerto Internashonal di Kòrsou. Ku inougurashon di balinan den bachi nobo e meta prinsipal ta pa sigui alsa e nivel di eksperensia pa e personanan ku ta bishitá nos airopuerto, den e kaso aki ku ta yega for di eksterior. Pa di e forma aki, logra konkretisá un paso mas den duna servisio mas profeshonal.

Imigrashon ta e promé kontakto ku un persona tin ku nos isla na momentu ku e yega di biahe. E proseso di imigrashon ta un proseso normal i nesesario ku ta tuma lugá na airopuerto di tur pais. Ta momentu pa para ketu ku e balinan nobo ta mas ku un proseso rutinario pasó e logro aki ta brinda oportunidat pa duna mérito na e trahadónan tambe. E trahadónan ku tur dia ta e promé karanan lokal ku e biahero ta topa. Pues ta bale la pena invertí den mehorá e infrastruktura ku outomátikamente ta impaktá e bista i ta keda mas profeshonal. Di e manera aki ta maksimalisá e uso di e espasio pa krea un ambiente plasentero pa tantu e biahero komo e trahadó.

Ku e meta aki Ministerio di Hustisia ta invertí stratégikamente den infrastruktura i teknologia pa transformá e eksperensia di ámbos banda. Sin pèrdè bista riba e seguridat i efisiensia ku e trabou di Imigrashon ta eksihí. E inougurashon di e balinan nobo ta un paso konkreto pasó e por parse simpel pero henter e ambiente ta transformá. Un bon servisio no ta solamente trata di finalisá e proseso di imigrashon korektamente, pero e ta tambe kon e persona ku ta ser atendé ta sinti durante e proseso. Sigur pasó nos ta un isla ku tur aña ta risibí miónes di turista. E filosofia aki ta forma parti di e trabou kontinuo di Ministerio di Hustisia pa sigui mehorá e manera ku nos organisashonnan ta funshoná.

Ya tabatin vários invershon ku a tuma lugá kaba i ainda falta mas pa sigui dal pasonan firme den direkshon pa bira aun mas profeshonal. E balinan nobo aki ta parti di un serie di invershonnan ku ya a kristalisá manera por ehèmpel e-gates, chaleko antibala pa e personal di Imigrashon i Curaçao Express Pass, pero tin mas invershon ku ta na kaminda. Kada invershon tin su propósito spesífiko, pero tur ta konektá na otro pa yega na un meta mas grandi pa Imigrashon na airopuerto: moderno i efisiente pa tur ku ta hasi uso di e servisio. Trabounan ta sigui pasó tin mas meta pa realisá pero awe nos ta para ketu na un paso mas serka di un mihó servisio, un mihó ambiente di trabou i un mihó promé impreshon di Kòrsou.