CBCS ta tuma despedida di Richard Doornbosch i duna bonbiní na hunta di maneho nobo 

CBCS ta tuma despedida di Richard Doornbosch i duna bonbiní na hunta di maneho nobo  

  

WILLEMSTAD/PHILIPSBURG — Centrale Bank van Curaçao en Sint Maarten (CBCS) a tuma  despedida di su presidente Richard Doornbosch na un resepshon di despedida selebrá na  Kòrsou i unu na Sint Maarten. Despues di seis aña na kabes di Banko Sentral, Doornbosch ta  retirá entrante 1 di sèptèmber pa bai forma parti di hunta direktivo di Autoriteit Financiële  Markten (AFM) na Hulanda. Entrante 2 di sèptèmber, Ference Lamp i Candice Henriquez lo  asumí funshon di, respektivamente, Presidente i Direktor Finansiero Ekonómiko di CBCS.  

Na ougùstùs di 2020, Doornbosch a asumí presidensia di CBCS. Su periodo komo Presidente a  mira vários desaroyo importante pa Banko sentral i sektor finansiero, manera resolushon di e  problemátika di ENNIA, fortifikashon i modernisashon di CBCS su supervishon i organisashon  interno, i introdukshon di florin karibense. 

Na Kòrsou, promé minister Gilmar Pisas a ekspresá su apresio pa e kontribushonnan ku  Doornbosch a hasi den e último seis añanan. ‘Na nòmber di gobièrnu i pueblo di Kòrsou, mi ke  gradisí bo pa e dedikashon eksepshonal ku bo tabatin na nos banko sentral i na nos sektor  finansiero; pa bo independensia, bo fortalesa den e añanan difísil i e trankilidat ku bo a trese  finalmente den Banko Sentral’, minister Pisas a bisa. 

Na e resepshon na Sint Maarten, minister di Finansa Marinka Gumbs a enfatisá Doornbosch su  esfuersonan na fabor di Sint Maarten su posishon den e union monetario. ‘Bo a traha duru pa  nos tambe por tin un lugá na mesa, pa nos por tin un bos i pa nos bos wòrdu skuchá. Esei ta algu  ku ta digno di nos apresio.’ El a karakterisá Doornbosch komo ‘un sirbidó públiko dediká, un  profeshonal respetá, un partner balioso i un amigu di Sint Maarten.’ 

Presidente interino di Hunta di Komisario, Julian Lopez Ramirez, tambe a dirigí palabra na  Doornbosch na ámbos resepshon. ‘Tabatin turbulensia i bientu kontrario. Pero awe, CBCS ta  pará mas fuerte. E fundeshi pa futuro t’ei awor,’ segun Lopez Ramirez. Entre otro, el a elogiá  Doornbosch su dedikashon i tenasidat, su bista skèrpi i su humanidat. 

Na su turno, Doornbosch a gradisí personal di CBCS, e gobièrnunan i demas stakeholdernan pa  e konfiansa i kooperashon risibí. Na Kòrsou, el a dirigí palabra spesialmente na e personal: ‘CBCS  i personal: Mi ta spesialmente orguyoso di boso. I ta boso falta lo mi sinti mas ku tur. Boso a  mustra ku por; ku dos pais chikitu por tin un banko sentral moderno, profeshonal i ku  ekspertisio.’ 

Na Sint Maarten, el a enfatisá ku Banko Sentral ta un banko kompartí: ‘Nos no ta Banko Sentral di  Kòrsou ku filial na Sint Maarten. Nos ta Banko Sentral di Kòrsou i Sint Maarten. Punto.’ I el a hasi e 

siguiente yamamentu na Sint Maarten: ‘Sinti boso orguyoso di boso Banko. Ta boso Banko  Sentral e ta. Hasi bon uso di su fortalesa.’ 

Komposishon nobo di Hunta di Maneho di CBCS  

Hunta di Komisario a postulá Ference Lamp komo susesor di Doornbosch den e funshon di  Presidente i Candice Henriquez komo Direktor Finansiero Ekonómiko. Huntu ku e aktual  Direktor-Sekretario, Leila Matroos-Lasten, nan lo forma e Hunta di Maneho nobo. Kòrsou i Sint  Maarten a aprobá ámbos postulashon. En espera di finalisashon di e proseso formal di  nombramentu, Lamp i Henriquez ta asumí nan respektivo funshon entrante 2 di sèptèmber. 

Lamp tin eksperensia internashonal amplio den sektor finansiero i a desempeñá funshon  ehekutivo di alto nivel, entre otro na Lehman Brothers, SNS REAAL i Bank of America. Su laso ku  Kòrsou a kuminsá basta aña atras. Ta aki el a sigui enseñansa sekundario i, durante su estudio na  universidat, el a kore stazje na loke e tempu ei tabata Bank van de Nederlandse Antillen. 

Henriquez ta den servisio di Banko Sentral for di 2005 i a desempeñá vários funshon di maneho  riba tereno di análisis ekonómiko, investigashon, maneho monetario i statistik. For di òktober di  2024, e ta Manager Monetary Policy, Economics and Statistics. 

E komposishon nobo aki di hunta di maneho ta garantisá kontinuidat direktivo di CBCS i ta un  kontinuashon di e desaroyo institushonal di Banko, basá riba e fundeshi ku a pone den e añanan  ku a pasa. 

Willemstad, 1 di sèptèmber 2026 

CENTRALE BANK VAN CURAÇAO EN SINT MAARTEN