Promé tayer di Wetboek van Strafvordering nobo a kuminsá

Promé tayer di Wetboek van Strafvordering nobo a kuminsá

 

WILLEMSTAD –  Djamars, 1 di sèptèmber 2026, ORV den kolaborashon ku Beleidsorganisatie di Ministerio di Hustisia, a organisá e promé tayer den kuadro di e implementashon di e Wetboek van Strafvordering Nobo (WvSvN). E tayernan akí a keda desaroyá dor di Onderwijskundige di ORV, Sra. Tisma Adhien, huntu ku Officier di OM, Sra. Monique Dennaoui.

 

Durante e apertura di e tayer, a hiba palabra Direktora di ORV, Sra. Alpha Falbru, Sector Manager di ORV, Sr. Jowenny Troeman, i Fiskal Mayor di OM, Sra. Clarelli Hato-Willems, na e promé grupo ku tabata konsistí di 22 partisipante di Korps Politie Curaçao (KPC).

 

Sr. Earl Ogenio di LrC a inisiá e seshon ku un introdukshon di e WvSvN, siguí pa dosentenan Sr. Maurits Rosalina i Sr. Wilbert Geertruida kende a fasilitá e tayer, enfokando riba e kambionan mas importante den e WvSvN, i interkambiá konosementu i eksperiensia ku e partisipantenan.

 

ORV ta karga e responsabilidat pa fasilitá e workshopnan di WvSvN durante un periodo di sinku siman pa diferente grupo i organisashonnan, inkluiendo KPC, Kustwacht, LrC, Interpol, Reclassering i empleadonan ku ta traha bou di Ministerio di Hustisia. E workshopnan tin komo meta pa informá i eduká partisipantenan riba e kambionan den e leinan nobo i prepará nan pa kontribuí na e implementashon di e WvSvN na yanüari 2027.

 

E promé tayer ku tabata un éksito, a terminá ku palabranan di Sekretario General interino di Ministerio di Hustisia, Sra. Luz-Celeste Johannes sigui pa e repartishon di sertifikadonan di e WvSvN na tur 22 partisipante ku a sigui e tayer.

 

Ku e inisio di e tayernan akí, ORV ta sigui kontribuí aktivamente na e preparashon di e diferente profeshonalnan i organisashonnan ku lo hunga un ròl importante den e implementashon di e Wetboek van Strafvordering nobo.