Gabinete Pisas III a renobá varios lokalidat deportivo den diferente bario di Kòrsou

WILLEMSTAD – Gobièrnu di Kòrsou ta kere fielmente ku invershon den deporte ta invershon den salú di nos pueblo, desaroyo di nos pais i futuro di nos nashon. For di kuminsamentu di e periodo di gobernashon, mehorashon i modernisashon di infrastruktura deportivo tabata un di e prioridatnan di Gabinete Pisas III. For di e kartera di Deporte, Minister di Edukashon, Siensia, Kultura i Deporte (ESKD), Sithree van Heydoorn, a traha konsekuentemente riba e meta aki, ku sosten i kolaborashon di henter Gabinete. Te ku awor, varios lokalidat deportivo den mas ku 15 diferente bario di Kòrsou a ser renobá òf mehorá.

E trabounan a tuma lugá na vèlt di futbòl i beisbòl, pero tambe na kancha di tènis, gimnasio, pisina i otro fasilidatnan deportivo. Ku e invershonnan aki, ta kontribuí na fasilidatnan mas adekuá pa hóben, adulto, klup i organisashonnan deportivo por desaroyá nan talento, praktiká deporte i hasi uso di e fasilidatnan den, òf mas serka di, nan propio bario.

Promé Minister Gilmar Pisas a indiká ku e resultado aki meresé mas atenshon pa sigui enkurashá nos pueblo: “Den e trabou diario di Gobièrnu, no semper tur logro ta keda fresku den memoria di pueblo. P’esei ta importante pa mustra ku den diferente bario di nos pais tin resultadonan konkreto. Kada vèlt, kancha òf fasilidat ku nos renobá ta representá un oportunidat pa nos hóbennan, un estímulo pa nos deportistanan i un mehorashon pa nos komunidat.”

E enfoke riba desaroyo i mantenshon di nos infrastruktura deportivo ta haña ainda mas signifikado den un momento ku Kòrsou ta eksperensiá logro deportivo ekstraordinario. Nos selekshon nashonal di futbòl, e Blue Wave, a klasifiká pa promé biaha pa e Kopa Mundial di FIFA; Andruw Jones a ser eligí pa e Salon di Fama di Beisbòl; i nos timnan di Little League i Senior League a alkansá prestashonnan sobresaliente riba tereno internashonal.

E logronan aki ta mustra kon leu talento, dedikashon, disiplina i trabou duru por hiba nos deportistanan. E reto i responsabilidat di Gobièrnu ta pa sigui krea e kondishonnan pa e siguiente generashon por desaroyá e talento ku nan tin. Invertí den fasilidatnan deportivo digno, moderno i aksesibel ta parti di e responsabilidat ei. Asina nos ta duna mas mucha i hóben e oportunidat pa praktiká deporte, desaroyá nan talento i, ken sa, alkansá logronan ainda mas grandi den futuro.

Minister di ESKD interino, Charetti-America, a agregá: “Gabinete Pisas III a skohe konsientemente pa pone infrastruktura deportivo haltu riba agenda. Un bon fasilidat deportivo no ta solamente un vèlt, kancha òf edifisio; e ta un lugá kaminda nos hubentut ta siña disiplina, kooperashon den ekípo i konfiansa den nan mes. Kada bario meresé di un lugá digno pa move, praktiká deporte i desaroyá talento. Na nòmber di Minister Van Heydoorn, mi ta yama danki na nos koleganan den Gabinete pa nan sosten, pa rekonosé e importansia di e invershonnan aki i, den diferente kaso, pa nan kontribushon finansiero. E sosten ei a permití nos realisá ainda mas.”

E lokalidatnan deportivo ku a ser renobá òf mehorá ta:

1. Vèlt di Mini Futbòl na Montaña
2. Vèlt di Ernst Meyer na Brievengat
3. Kancha di tènis na Monrepo
4. Kancha di tènis na Damacor
5. Sentro Hubenil Mahuma
6. CRKSV Jong Colombia di Boka Sami
7. Renobashon Pòst 6
8. Vèlt di Pinchingolo na Buena Vista
9. V. Vesta na St. Maria
10. Akademia Beisbòl Brievengat
11. Sala Deporte Multifunshonal na Barber
12. Cirilo Chirino Ballpark na Tra’i Seru
13. V.V. Willemstad na Saliña
14. Frank Curiel Ballpark na St. Maria
15. Vèlt na Heintje Kool
16. Vèlt na Koraal Specht
17. Montab Ballpark na Montaña Abou
18. Pisina Enith Brigitha na Brievengat
19. Gimnasio di Skol Avansá Amador na Parera
20. Vèlt di Skol Avansá Amador Nita na Parera
21. Sabana Ballpark na Santa Rosa
22. Sam Bunting Ballpark na Brievengat
23. Vèlt di Soto Arena
24. Stadion Ergilio Hato na Brievengat
25. S.U.B.T. na Saliña
26. Van Engelen Ballpark na Suvek
27. Victory Boys na Santa Rosa
28. Gimnasio di St. Joris

E renobashonnan aki a akumulá den un invershon total di mas o ménos 35 mion florin (Karibense) durante e último sinku añanan. Danki na e invershonnan aki, awendia míles di hóben tin akseso na mihó fasilidatnan deportivo den nan propio bario. Esaki ta sin konta finansiamentu di biahenan di diferente tim i atleta pa representá Kòrsou den kompetensia i torneonan deportivo internashonal.

E renobashon di e lokalidatnan aki, sinembargo, no ta solamente un invershon den infrastruktura deportivo. E ta tambe un invershon den salú públiko, formashon di nos hubentut, koheshon sosial i desaroyo di nos talentonan deportivo.

Pero e trabou no ta para aki. E lista aki ta reflehá e resultadonan ku a ser alkansá den e último sinku añanan, mientras e invershonnan den nos infrastruktura deportivo ta kontinuá. Gabinete Pisas III lo sigui traha pa renobá i mehorá mas lokalidat deportivo. Entre e siguiente pasonan ku ta na kaminda tin mantenshon di nos pista di atletismo, kanchanan di volley, yerba na Montab ballpark i e desvelo di e vèlt di beisbòl nobo na e lokalidat di Cirilo Chirino Ballpark na Tra’i Seru, vèlt di Academia di basball Jandoret i e Vèlt di futbòl na Tera Kòrá.

Finalmente, Gabinete Pisas III ta rekonosé e balor agregá ku deporte tin pa komunidat di Kòrsou i lo sigui enfoká riba kreamentu di kondishonnan ku ta stimulá moveshon, partisipashon i desaroyo di nos pueblo. E lokalidatnan ariba menshoná ta muestra palpabel di e kompromiso pa sigui invertí den deporte den tur bario di Kòrsou. Asina nos ta aportá na konstrukshon di un nashon di kalidat, fuerte i uní.