CBCS ta risibí sosten di NGFS pa sigui desaroyá su senarionan di riesgo klimátiko
No. 2026-029
CBCS ta risibí sosten di NGFS pa sigui desaroyá su senarionan di riesgo klimátiko
WILLEMSTAD/PHILIPSBURG — Centrale Bank van Curaçao en Sint Maarten (CBCS) a keda selektá pa risibí sosten tékniko internashonal pa fortalesé su trabou riba tereno di senario klimátiko. Esei a tuma lugá den e promé tanda di e inisiativa di Network for Greening the Financial System (NGFS), pa fortalesementu di kapasidat (capacity building). Ku esaki, CBCS lo ta den un mihó posishon pa midi ki efekto kambio klimátiko por tin riba ekonomia i sektor finansiero tantu na Kòrsou komo na Sint Maarten.
E inisiativa akí ta respaldá CBCS su ophetivo stratégiko di integrá riesgo klimátiko i sostenibilidat den su normanan di supervishon i su funshonamentu. Riesgo relashoná ku klima por afektá ekonomia i sistema finansiero komo konsekuensia di tormenta mas pisá, sekura mas largu i temperatura mas haltu, i e ekonomianan di isla chikitu manera Kòrsou i Sint Maarten ta spesialmente vulnerabel. CBCS ke mehorá su manera di evaluá e riesgonan akí pa, di e manera ei, e kontribuí pa nos union monetario por tin un sektor finansiero resiliente i kapas pa enfrentá e retonan di futuro.
Entrante 2027, CBCS su Departamento di Análisis i Investigashon Ekonómiko lo kolaborá ku un eksperto riba tereno di senario di klima, nombrá pa NGFS. Huntu, nan ta bai desaroyá modelo práktiko di riesgo klimátiko adaptá na e sirkunstansianan lokal ku ta eksistí na Kòrsou i Sint Maarten. Esei lo resultá den un transferensia di konosementu i ekspertisio spesialisá ku lo fortalesé CBCS su kapasidat pa inkorporá senario i stress test klimátiko den su análisis- i pronóstikonan ekonómiko i den su kuadro pa evaluashon di riesgo en general.
Ademas, CBCS a nombra un Koordinadó di Asuntu Klimátiko ku lo dirigí i koordiná CBCS su trabounan riba tereno di klima. E ròl akí ta kombiná diferente proseso di trabou relashoná ku análisis di senario klimátiko, investigashon riba tereno di klima i desaroyo di un kuadro koherente pa supervishon di asuntu relashoná ku klima. Tambe, e Koordinadó di Asuntu Klimátiko ta representá CBCS na foro lokal, regional i internashonal, manera Curaçao Climate Change Platform, e grupo tékniko di trabou tokante kambio klimátiko Caribbean Group of Banking Supervisors i NGFS.
‘CBCS ta mashá kontentu di a keda selektá pa risibí e sosten tékniko importante akí’, segun Paloma Abbad, Koordinadó di Asuntu Klimátiko di CBCS. ‘E sosten akí lo yuda nos fortalesé nos proseso di trabou riba tereno di senario klimátiko. E modelonan pa senario klimátiko ku nos lo produsí di e manera ei por duna nos un bista mas skèrpi di e diferente maneranan ku kambio klimátiko por afektá ekonomia i sektor finansiero na Kòrsou i Sint Maarten. Tambe, esaki lo yuda nos sigui integrá riesgo klimátiko den nos investigashon ekonómiko, monitoreo di stabilidat finansiero i aktividatnan di supervishon.’
Tokante NGFS
NGFS ta un ret internashonal di banko sentral i entidat di supervishon finansiero ku ta interkambiá práktika rekonosí (best practice) i ta kontribuí na desaroyo di maneho di riesgo klimátiko i ambiental den sektor finansiero. E inisiativa pa fortalesementu di kapasidat ta un parti esensial di NGFS su strategia pa 2026–2027, titulá From Principles to Practice, pa yuda e bankonan sentral i entidatnan supervisor usa nan instrumentonan pa análisis klimátiko den práktika. NGFS tin tres prioridat: sigui sirbi komo un plataforma tékniko pa inovashon riba tereno klimátiko, fortalesé su papel komo un sentro di ekspertisio tokante senario klimátiko i fortalesé kapasidat di e bankonan sentral rònt mundu pa apoyá implementashon práktiko di e instrumentonan disponibel pa yega na un sistema finansiero mas sostenibel (bèrdè).
Willemstad, 9 di sèptèmber 2026
CENTRALE BANK VAN CURAÇAO EN SINT MAARTEN
