FFK I DICK ADVOCAAT TA PROLONGÁ NAN RELASHON DI TRABOU TE YÜLI 2027!
FFK I DICK ADVOCAAT TA PROLONGÁ NAN RELASHON DI TRABOU
TE YÜLI 2027!
Federashon Futbòl Kòrsou i Dick Advocaat a yega na un akuerdo pa prolongá nan relashon di trabou. E entrenadó Hulandes ku hopi eksperensia lo keda te ku 31 di yüli 2027 komo entrenadó prinsipal di e ekipo nashonal di Kòrsou. Ku e prolongashon aki, FFK ta skohe deliberadamente pa kontinuidat, stabilidat i trankilidat rondó The Blue Wave, miéntras e federashon ta sigui traha riba e desaroyo duradero di futbòl di Kòrsou.
Bou di guia di Advocaat, Kòrsou a pasa dor di un periodo bastante spesial. E ekipo nashonal a logra bon resultado internashonal i a dal pasonan importante den su desaroyo deportivo.
E kooperashon entre e entrenadó nashonal, e grupo di hungadónan i e staf tékniko a kontribuí na un ambiente profeshonal i stabil kaminda e ekipo nashonal por sigui desaroyá su mes.
Un parti importante di e staf tékniko aktual lo keda envolví, pa asina por sigui traha riba e base ku a wòrdu poné durante e periodo anterior. Pronto Advocaat lo anunsiá su selekshon pa e próksimo weganan den e CONCACAF Nations League, kaminda Kòrsou lo enfrentá Costa Rica, Nicaragua i Trinidad & Tobago.
“E grupo aki ta hopi dushi pa traha kuné. Nos a logra pone algu spesial riba pia huntu i mi ta deseá pa sigui traha ku e hungadónan i staf pa sigui konstruí riba loke ya nos a logra,” Dick Advocaat a duna di konosé.
Pa FFK, e prolongashon di kontrato ta kai den un vishon deportivo mas amplio; kombiná ku trankilidat i stabilidat rondó di e selekshon nashonal ku un desaroyo duradero a largo plaso. P’esei, e federashon ta sigui invertí den desaroyo, konosementu, fortalesé e kuadro tékniko lokal i traha riba e futuro di e organisashon tékniko.
“Ku e prolongashon aki nos ta skohe pa kontinuidat i stabilidat rondó nos selekshon nashonal. Nos ta hopi kontentu ku Dick Advocaat ta sigui kompartí su eksperensia, konosementu i liderato na Kòrsou. Na mes momento, komo federashon, FFK ta sigui mira pa dilanti. Nos ta invertí den desaroyo, konosementu, fortalesé e kuadro tékniko lokal i un organisashon tékniko ku ta kla pa futuro, p’asina e desaroyo positivo di e añanan ku a pasa por bira un parti duradero di e futbòl di Kòrsou. Asina nos ta sigui traha riba futuro di futbòl di Kòrsou,” Fabi Constansia, presidente interino di FFK a deklará.
Ku e kontrato nobo, FFK i Dick Advocaat ta ekspresá nan konfiansa den e rumbo ku nos ta bayendo. Mas informashon tokante e staf tékniko i e siguiente pasonan den e organisashon deportivo lo wòrdu kompartí den transkurso di dianan via e kanalnan ofisial di FFK.
E selekshon lo wòrdu anunsiá djabièrnè 11 di sèptèmber 2026. FFK lo manda un programa pa tur media den e siman di 14 di sèptèmber ku e aktividatnan importante di nos selekshon.
Djaluna 21 di sèptèmber 2026, di 15:30 te 16:30 di atardi lo tin un konferensia di prensa na Corendon. Nos lo manda e invitashon ofisial di e rueda di prensa aki ku tur detaye i ta pidi ku esnan ku ta interesá pa asistí por manda nan registrashon adelantá na marketing@ffk.cw.
Keda pendiente pa mas informashon…
9 di sèptèmber 2026
