𝐊ò𝐫𝐬𝐨𝐮 𝐢 𝐒ü𝐫𝐧𝐚𝐦 𝐭𝐚 𝐬𝐢𝐠𝐮𝐢 𝐟𝐨𝐫𝐭𝐚𝐥𝐞𝐬é 𝐧𝐚𝐧 𝐤𝐨𝐨𝐩𝐞𝐫𝐚𝐬𝐡𝐨𝐧

Promé Minister Gilmar Pisas a risibí djamars 15 di septèmbèr 2026 Konsul General nobo di Repúblika di Sürnam, señora Joraisa Pokie, pa un bishita di kortesia. E enkuentro a brinda oportunidat pa sera konosí i interkambiá ideanan tokante diferente área kaminda Kòrsou i Sürnam por sigui fortalesé nan kooperashon.

Durante e kombersashon, señora Pokie a resaltá diferente sektornan ku ta ofresé oportunidat pa mas kolaborashon entre ámbos pais. Entre otro, nan a papia tokante Hustisia, un área kaminda ya tin desaroyonan positívo, pero tambe agrikultura, enseñansa i navegashon marítimo. Den e áreanan aki tin oportunidat pa kompartí konosementu, eksperensia i eksplorá inisiativanan ku por ta di benefisio pa ámbos pais.

Tambe e desaroyonan den e sektor di petroleo i gas na Sürnam a forma parti di e kombersashon. E sektor emergente aki ta representá un área importante den desaroyo ekonómiko di Sürnam i ta ofresé oportunidat pa interkambio di konosementu i eksperensia.

E bishita a transkurí den un ambiente habrí i konstruktivo, ku ámbos parti ekspresando nan deseo pa sigui profundisá e bon relashon entre Kòrsou i Sürnam i eksplorá oportunidatnan konkreto pa mas kooperashon.