DJABIÈRNÈ 2 DI ÒKTOBER TA ÚLTIMO DIA PA INSKRIBÍ PA ELEKSHONNAN DI KARNAVAL 2027
Willemstad, Kòrsou – Na nòmber di IBFF i BEEHIVES B.V., Relashonista Públiko i Presidente di Hurado pa elekshonnan di Karnaval 2027, Joël Amadou Villarreal, ta informá komunidat ku djabierne 2 di òktober 2026 ta e último dia ofisial pa inskribí pa partisipá den elekshonnan di Karnaval 2027.
Interes pa e elekshonnan di e temporada aki ta grandi. Vários kategoria ta práktikamente yen, algu ku ta demostrá e entusiasmo, konfiansa i deseo ku komunidat tin pa forma parti di e proseso renobá aki.
P’esei, IBFF i BEEHIVES B.V. TA YAMA UN DANKI SINSERO NA KOMUNIDAT
Joël, di parti di e organisashonnan, ta hasi uso di e oportunidat aki tambe pa ekspresá un danki profundo na tur mayor, famia, partisipante i persona ku ya a hasi uso di e oportunidat pa inskribí nan yu, òf ku a tuma e paso pa inskribí nan mes.
E konfiansa aki ta di gran balor.
Tur esnan ku a inskribí ta prepará pa haña e oportunidat di subi esenario dia 17 di yanüari 2027, kaminda nan por demostrá nan talento, kreatividat, karisma i amor pa nos Karnaval.
“Hopi biaha, kambio por trese desafío den su proseso di komprondementu i adaptashon. Pero ora kambio ta dirigí na progreso, kalidat i kresementu, e esfuerso ta wòrdu kompensá pa e resultado ku nos logra huntu.”
IBFF i BEEHIVES B.V. ta konsiente ku kada proseso nobo ta pidi tempu, adaptashon i komunikashon. P’esei, e organisashonnan ta sumamente gradesido ku e komunidat a duna e proseso un oportunidat i a demostrá su konfiansa mediante e gran kantidat di inskripshonnan ku a drenta.
Danki Kòrsou. Danki na tur mayor. Danki na tur partisipante. Danki na tur hende ku a skohe pa kere den e proseso.
E aseptashon i konfiansa di komunidat ta motivá nos pa sigui traha ku seriedat, transparensia i dedikashon pa entregá un proseso i un produkshon digno di nos Karnaval.
DJABIÈRNÈ 2 DI ÒKTOBER 2026
ÚLTIMO DIA DI INSKRIPSHON
KATEGORIANAN TA PRAKTIKAMENTE YEN
Si ainda bo no a inskribí, e momento ta awor. No laga bo último chèns pasa.
Nos ta mira otro 17 di yanüari 2027, ora talento, preparashon i pashon lo uni riba escenario.
Atentamente,
Joël Amadou Villarreal
Relashonista Públiko
Presidente di Hurado – Elekshonnan di Karnaval 2027
Na nòmber di IBFF & BEEHIVES B.V.
