KUERPO POLISIAL KÒRSOU 

KOMUNIKADO DI PRENSA

335/2026

1 òktober 2026 

Kaso di tiramentu ku morto 

Djarason 30 di sèptèmber 2026 alrededor di 21.38’or, Sentral di Polis a  risibí informashon ku un tiramentu a tuma lugá riba e lugá di stashoná outo na Plaza Mundu Merced. 

Mesora a dirigi un unidat di warda di polis di Punda na e sitio.  

Na su yegada, el a topa un hòmber drumí abou riba su barika tras di un  outo den un plas di sanger i ku ya no tabata reakshoná. 

Den besindario di e vehíkulo, polis a topa diferente kashi di bala. Personal di ambulans tambe ku a yega na e sitio, no por a hasi nada mas  pa e víktima. Dòkter di polis algun ratu despues a konstatá morto. 

For di investigashon preliminar, polis a komprondé ku un ratu promé algun  hòmber lo tabatin un problema ku e víktima i despues nan a lòs tirunan  dirigí riba dje ku a alkansé na diferente parti di su kurpa. 

Banda di e víktima polis a topa un arma di kandela, ku a keda konfiská. 

Despues di nan akto, e sospechosonan a hui den direkshon pariba na pia.  No ta konosí si despues mas na distansia, nan a drenta un outo i bai for di  e sitio. 

E víktima a keda identifiká komo Sendriek Everon Rosa, nasé na Kòrsou  dia 22 di novèmber 1992. 

Riba òrdu di fiskal di Ministerio Públiko a konfiská e kurpa pa mas  investigashon.

 

---