Djabièrnè, 2 di òktober 2026, a tuma lugá dos Ora di Pregunta den sala di reunion di Parlamento di Kòrsou, kaminda Minister Gilmar Pisas a presentá pa kontestá i duna informashon riba e tópikonan ku a keda poné riba agènda.

E promé Ora di Pregunta tabata dediká na e tópiko “Apagon i schakelmentu di koriente”. Minister di Asuntunan General, sr. Gilmar Pisas, a presentá pa kontestá e preguntanan formulá dor di Miembro di Parlamento, sra. Suzy Camelia-Römer.

Durante e di dos Ora di Pregunta, a trata dos tópiko: “Kandela na Landfill Malpais, huma i posibel konsekuensianan pa bario den bisendario” i “Situashon finansiero i finansamentu struktural di Curaçao Medical Center (CMC)”. Minister Pisas enkargá ku Medio Ambiente i Naturalesa i alabes den kalidat di Minister di Salubridat Públiko suplente, a presentá pa kontestá preguntanan relashoná ku e tópikonan menshoná.

Debí na e kantidat di preguntanan ku Minister Pisas mester a kontestá, Presidente di Parlamento a duna únikamente e petishonario di kada tópiko e oportunidat pa durante dos minüt reakshoná riba e kontestanan.

Pa loke ta trata e tópiko “Situashon finansiero i finansamentu struktural di Curaçao Medical Center (CMC)”, Minister Pisas a logra kontesta 23 di e 31 preguntanan i a palabrá ku e sobrá preguntanan lo keda kontestá por eskrito.

E petishonnan pa e dos tópikonan aki a keda hasí dor di e Miembronan di Parlamento, sr. David Seferina i sra. Giselle Mc William.

Na final, Presidente di Parlamento sr. Fergino Brownbill a sera e enkuentro.