𝐊𝐎𝐌𝐏𝐑𝐀 𝐃𝐈 𝐒𝐄𝐇𝐎𝐒 𝐃𝐎𝐑 𝐃𝐈 𝐆𝐎𝐁𝐈𝐄̀𝐑𝐍𝐔 𝐃𝐈 𝐊𝐎̀𝐑𝐒𝐎𝐔 𝐓𝐀 𝐔𝐍 𝐏𝐀𝐒𝐎 𝐈𝐌𝐏𝐎𝐑𝐓𝐀𝐍𝐓𝐄 𝐃𝐄𝐍 𝐕𝐈𝐒𝐇𝐎𝐍 𝐃𝐈 𝐆𝐎𝐁𝐈𝐄̀𝐑𝐍𝐔 𝐏𝐀 𝐑𝐄𝐕𝐈𝐓𝐀𝐋𝐈𝐒𝐀́ 𝐎𝐓𝐑𝐎𝐁𝐀𝐍𝐃𝐀

WILLEMSTAD 2 di Oktober 2026– Firma di e akta di kompra di e anterior Sint Elisabeth Hospitaal (SEHOS) ta marka un paso importante den e vishon di Gobièrnu pa sigui revitalisá Otrobanda. Gobièrnu di Kòrsou i CMC Vastgoed a kumpra e kompleho for di Otrabanda Village B.V. i Kunuku Aqua Resorts Holding B.V.

E kompra aki ta krea e posibilidat pa desaroyá e kompleho históriko, situá banda di Curaçao Medical Center (CMC), den konekshon ku e bario. Kuido, patrimonio, bibienda, komèrsio, rekreashon i enkuentro ta forma e base pa e desaroyo. Asina, un área ku pa hopi aña tabata un kompletamente será por bira un parti aktivo di e bida diario di Otrobanda.

Durante e enkuentro, minister di Tráfiko, Transporte i Planifikashon Urbano, ing. Charles Cooper, Bas Filipini na nòmber di Otrabanda Village, i ir. Dito Garmers na nòmber di CMC Vastgoed, a dirigí palabra na esnan presente. Despues, e partidonan a firma e akta.

E kompra ta forma parti di un direkshon stipulá dia 11 di aprel 2013, ora un mayoria di Parlamentu a skohe pa konstruí e hòspital general nobo na Otrobanda. E desishon ei a konektá e binida di CMC ku e futuro di e barionan rònt di dje. E kompra stratégiko di Colon i, despues, di e edifisio Chepacu, tambe a kontribuí na e direkshon ku Gobièrnu a stipulá.

For di komienso di e proseso, Gobièrnu di Kòrsou a hasi esfuerso pa kumpra SEHOS pa medio di kòmbersashonnan i proposishonnan. E intenshon aki a permanesé, tambe despues ku e kompleho a wòrdu bendí na doñonan privá. Komo doño di e komplehonan St. Thomas i Poli, ku ta situá banda di SEHOS, Gobièrnu di Kòrsou tabata ke dirigí e desaroyo di e área. Gobièrnu ta konsiderá esaki parti di su responsabilidat pa komunidat. Esta, kombiná diferente uso di e área di forma kuidadoso i konektá SEHOS fuertemente ku Otrobanda. CMC a uni na e proseso aki a base di e modelo di kuido ku e ke desaroyá.

Otrabanda Village i Kunuku Aqua Resorts Holding ta rekonosé e ròl di Gobièrnu pa dirigí e desaroyo di e área komo un totalidat i protehá e interes di komunidat. A base di e vishon kompartí aki, nan a kooperá ku e benta. Finalmente, e partidonan a yega na e konklushon, ku e benta ku Gobièrnu di Kòrsou i CMC Vastgoed, tabata ofresé e mihó base pa realisá esaki.

Konservá i fortifiká e karakter di Otrobanda ta sentral den e desaroyo. E bario ta karakterisá pa e kombinashon di bibienda, trabou, kompanianan chikí, kultura i enkuentro. E desaroyo di SEHOS mester duna kontinuidat na esaki, uso di edifisionan ku balor kultural i históriko, espasio públiko aksesibel, área bèrdè i oportunidat pa empresarionan lokal i aktividatnan kultural. Asina, e kompleho por duna un impulso tantu na konservashon komo na e futuro di e bario. E punto di salida ta un área habrí, konektá ku e kayanan i hanchinan rònt di dje, di kua habitantenan i empresarionan tambe por benefisiá.

SEHOS ta forma tambe un promé paso pa un futuro área di kuido rònt di CMC. Un di e promé usonan ku ta den konsiderashon ta kuido pa rekuperashon: kuido di enfermeria i guia temporal pa personanan ku por sali for di hospital, pero ku ainda no por bai kas. E kantidat di lugá nesesario i e forma di organisá e kuido aki ta den investigashon mas aleu. A base di esaki, por desaroyá un proposishon di servisio ku ta konektá prevenshon, tratamentu, rekuperashon i sosten. E konsepto di Blue Zone ta duna direkshon na un ambiente ku ta stimulá un bida salú, ku ruta sigur pa kana, sombra, área bèrdè i lugánan pa hende topa otro.

Despues di e kompra, lo pone e kompleho den uso den fase. Promé, e atenshon lo ta riba limpiamentu, seguridat i hasi partinan di e kompleho sigur i aksesibel. E meta ta pa risibí komunidat na desèmber, ku Misa di Ourora den e kapèl i un marshe di Pasku rònt di e edifisio. Pa esaki, lo buska konekshon ku e aktividatnan ku ya e bario di Otrobanda a inisiá. For di e promé kuartal di 2027, ta premirá pa kuminsá un proseso di partisipashon tokante e futuro uso di e área. E proseso aki lo konektá ku e vishon pa e bario ku ta desaroyá for di Otrobanda mes.

Miéntrastantu, aktividatnan temporal, merkadonan i un programa kultural mester trese bida den e área. Lo tuma e eksperensianan aki na konsiderashon den e programa final.

Gobièrnu di Kòrsou lo perkurá pa e diferente partinan di e área konektá bon ku otro i pa e interes di komunidat wòrdu protehá. Organisashonnan di kuido, empresarionan i desaroyadónan por kontribuí na e realisashon denter di e kuadro aki. Gobièrnu di Kòrsou i CMC Vastgoed kada un a finansiá nan propio parti di e kompra.

E fondonan di CMC Vastgoed pa e kompra aki ta separá for di e presupuesto pa mantené i konservashon di hòspital.